Almaty medısınalyq týrızmdi damytýda: jyl saıyn qala klınıkalarynda 15 myńnan astam shetel azamaty em qabyldaıdy.
Aldaǵy jyldary Almatyda 30-dan astam densaýlyq saqtaý nysanynyń qurylysy men jańǵyrtýy bastalady
Almaty qalasynda densaýlyq saqtaý júıesin jańǵyrtýdyń aýqymdy baǵdarlamasy jalǵasýda. Qala sońǵy on jyldaǵy eń iri qurylys jáne jańǵyrtý jobalaryn júzege asyrýda.
Almaty qalasy ákiminiń orynbasary Nurlan Ábdirahym Óńirlik komýnıkasıalar qyzmetiniń baspasóz alańynda ótken brıfıńte málimdegendeı, 2025 jyldyń sońyna deıin eki bastapqy medısınalyq-sanıtarlyq kómek ortalyǵy men bir jedel járdem qosalqy stansıasynyń, sondaı-aq ár aýysymda 500 kelýshige arnalǵan bes jańa emhananyń qurylysy aıaqtalady.
Jańa nysandar Dýman, Quramys, Shuǵyla, Altaı-1 shaǵyn aýdandarynda jáne Aıteke bı kóshesinde ornalasady.
Aldaǵy jyldary 30-dan astam medısınalyq nysannyń qurylysy men qaıta jańǵyrtylýy josparlanyp otyr, olardyń qatarynda:
300 tósekke arnalǵan kópsalaly aýrýhana (Daraboz shaǵynaýdany);
200 tósekke arnalǵan perınataldyq ortalyq;
№4, №7 aýrýhanalary men №1 perzenthananyń jańa korpýstary;
Psıhıkalyq densaýlyq ortalyǵy jáne balalardy ońaltý ortalyǵy bar.
«Sońǵy 10 jylda mundaı aýqymdaǵy jańǵyrtý jumystary júrgizilmegen. Biz aldaǵy jyldarǵa arnalǵan sapaly medısınalyq ınfraqurylymdy qalyptastyryp jatyrmyz», - dedi qala ákiminiń orynbasary.
Qazirgi ýaqytta Almatyda 14 qosalqy stansıa jáne 188 jedel járdem brıgadasy jumys isteıdi. Olar táýligine úsh myńǵa deıin shaqyrtýǵa qyzmet kórsetedi.
Aıta keteıik, Respýblıka kúnine oraı qalalyq jedel medısınalyq járdem qyzmeti 50 jańa avtokólikpen tolyqty. Onyń ishinde 12 “S” klasty reanımobıl jáne 38 “V” klasty sanıtarlyq kólik bar. Avtoparkti jańartýǵa jalpy 3 mlrd teńge jumsaldy. Barlyq kólikter halyqaralyq standarttarǵa saı zamanaýı jabdyqtarmen qamtamasyz etilgen.
«Jańartylǵan avtopark shuǵyl kómek kórsetýdi burynǵydan da jyldam ári sapaly etýge múmkindik beredi», - dep atap ótti Nurlan Ábdirahym.
Sonymen qatar, Almaty Qazaqstandaǵy medısınalyq týrızmniń jetekshi ortalyǵy mártebesin saqtap keledi. Jyl saıyn megapolıs klınıkalarynda 15 myńnan astam shetel azamaty em qabyldaıdy. Eń kóp suranysqa ıe baǵyttar – kardıohırýrgıa, ortopedıa, onkologıa, reprodýktıvti jáne estetıkalyq medısına.