Qala ákimi Erbolat Dosaevtyń tapsyrmasyna sáıkes búdjetke engizilgen ózgerister qalanyń áleýmettik basymdyqtaryn iske asyrýǵa baǵyttalǵan.
Búgin Almaty qalasy Máslıhatynyń jergilikti búdjetti naqtylaý jónindegi XV sesıasy ótti, dep habarlaıdy Almaty-akshamy.kz
Megapolıs basshysynyń bastamasymen búdjettiń qazirgi shyǵyndary, atap aıtqanda festıváldar, forýmdar men túrli ımıjdik is-sharalardy ótkizýge arnalǵan shyǵyndar qysqartyldy. Qosymsha bólinetin qarajattyń 60%-dan astamy damýǵa – áleýmettik mańyzy bar jobalarǵa baǵyttalady.
Almaty qalasy qarjy basqarmasynyń basshysy Qanat Sýhambekov atap ótkendeı, jalpy búdjetti naqtylaý búdjet qarajatyn ishki qaıta bólý jáne 2023 jyly búdjettiń kiris bóligin asyra oryndaý esebinen júrgiziledi.
«Jaıly mektep» Ulttyq jobasy aıasynda 37 100 oqýshyǵa arnalǵan 22 mektep salý jumystary jalǵasyp otyr. Jergilikti búdjetten qaladaǵy 13 mekteptiń ınjenerlik-kommýnıkasıalyq ınfraqurylym (jylý- sýmen jabdyqtaý, elektr qýaty) jáne talshyqty-optıkalyq baılanys jelilerin salýǵa qarajat bólinedi.
2024 jyly Shuǵyla shaǵyn aýdanynda týberkýlezdiń belsendi emes túri bar balalardy oqytýǵa arnalǵan sanatorıı úlgisindegi jataqhanasy bar 340 oryndyq jańa mektep, sondaı-aq Almaty telekomýnıkasıa jáne mashına jasaý kolejiniń qurylysy bastalady. Buǵan qosa, №58, 73, 83 mektepter men respýblıkalyq fızıka-matematıka mektebiniń ǵımarattaryn qaıta jańartý josparlanǵan.
Bıyl qurylys jumystary Alataý aýdanynyń «Rahat-Mádenıet» shaǵyn aýdanyndaǵy elektrmen jabdyqtaý jelilerin salýǵa qatysty bolady. Osylaısha, 2024 jyldyń sońyna deıin Alataý aýdanynyń 10 myń turǵyny úzdiksiz elektrmen qamtamasyz etiledi.
Bıyl 3 kólik-aýystyryp miný torabynyń qurylysy bastalady: Raıymbek dańǵyly, «№ 7 qalalyq aýrýhana» aıaldamasy, Bókeıhanov kóshesi, 508, «Sálem» avtovokzaly, Pýshkın kóshesi jáne Raıymbek dańǵyly, «Saıahat» aıaldamasy), bul oblystan kelgen turǵyndarǵa kóligin arnaıy turaqqa qaldyrýǵa jáne qoǵamdyq kólikti paıdalanýǵa múmkindik beredi.
Sondaı-aq, 30 km trotýarlardy, 5 km velojoldardy (velojolaqtardy), 40 aıaldama qaltasy men alańdy ortasha jáne aǵymdaǵy jóndeý josparlanǵan.
Skverlerdi, saıabaq aımaqtary men qoǵamdyq keńistikterdi abattandyrý josparlanǵan. Almaly aýdanynda Panfılov kóshesiniń (Qabanbaı batyrdan Jibek jolyna deıin) jaıaý júrginshiler aımaǵyna aǵymdaǵy jóndeý jumystary júrgiziledi. Medeý aýdanynda 4 skver men býlvarǵa, onyń ishinde «Energetıkter», «Dýman-2» skverleri aǵymdaǵy jóndeýden ótedi.
«Terenkýr» saıabaq aımaǵy kóliniń aınalasyndaǵy aýmaqty aýqymdy qaıta qurý josparlanǵan. Jumys bitken soń munda toǵan boıynda serýendeý joly bar keń demalys aımaǵy, eki deńgeıli balalar eko alańy, vorkaýt aımaǵy, sport jáne ıoga alańdary bolady. Sondaı-aq, jobada ashyq aspan astynda amfıteatr ornatý qarastyrylǵan. Saıabaq aımaǵy megapolıstiń turǵyndary men qonaqtary úshin tartylys ortalyǵyna aınalady.