Almaty marafony - World Athletics standarttaryna saı sertıfıkattalǵan eń úlken júgirý jarysy.
Búgin tústen keıin ótken «Almaty marafony–2023» halyqaralyq jarysy 15 jastan asqan sportshylar men kóptegen kórermenderdi jınady. Jarystyń bastalýy men aıaqtalýy Respýblıka alańynda boldy, dep habarlaıdy Almaty-akshamy.kz.
Qatysýshylarǵa tórt qashyqtyqtyń birin tańdaý múmkindigi berildi: 42 shaqyrymdyq klasıkalyq marafon nemese onyń jartysy men tórtten biri. Sonymen birge, 42,2 jáne 21,1 shaqyrym qashyqtyqta, aldyn ala irikteýden ótken ozyq qatysýshylar úshin «elıta» sanaty qarastyrylǵan. Almaty marafonynyń keıbir qatysýshylary skandınavıalyq serýenmen 10 shaqyrym qashyqtyqty eńserýdi tańdasa, basqalary komandalyq estafetaǵa qatysty.
Sondaı-aq, Almaty marafony aıasynda bıyl alǵash ret 35 jastan asqan qatysýshylar úshin tas jolda 10 km júgirýden Qazaqstan Respýblıkasynyń chempıonaty ótti.
Uıymdastyrýshylardyń aıtýynsha, marafon bıylǵy jyly 15 600 adamnyń basyn qosty, marafon ótkizilgen alǵashqy jyly 2012-de oǵan 2,5 myń adam qatysqan bolatyn.
Júgirý jarysynyń basynda da, sońynda da merekelik atmosfera ornady. Buǵan shýaqty aýa raıy, kóńildi mýzyka, adamdardyń kóterińki kóńil-kúıleri de áser etti dese bolady. Kórermender tarapynan da júgirýge kelgenderge qoldaý kórsetkender qarasy qalyń boldy. Marafonshylardyń arasynda alǵash ret osyndaı jarysqa qatysqandar da boldy. Jappaı júgirý jarysynan Almaty ákimi Erbolat Dosaev ta kózge túsip qaldy, tipti onymen qashyqtyqty eńserý kezinde keıbir sportshylar selfıge túsip úlgergen.
Uıymdastyrýshylardyń aıtýynsha, Almaty marafony – qaıyrymdylyq is-shara. Qatysýshylardyń bastapqy jarnalarynan túsken qarajattyń bir bóligi 68 mln teńge kóleminde sporttyq ınfraqurylym salýǵa jáne úsh balalar úıine, dene jáne aqyl-oı damý erekshelikteri bar balalarǵa arnalǵan úsh ońaltý ortalyǵyna, psıhıatrıalyq mekemege, sondaı-aq Almaty men Almaty oblysynyń Ortalyq stadıonyna arnaıy jabdyqtardy satyp alýǵa baǵyttalatyn bolady.