Elimizde sońǵy kezderi qarqyndy óris alǵan mamandyq paıda boldy. Buryn ondaıdy sheteldiń kınolarynan kórýshi edik. Búginde jetkizý qyzmeti áp-sátte kerek- jaraqty ákelip, aparyp tur.
«At jetpegen jerge, hat jetip tur»
Almaty – úlken megapolıs. Bir shetinen ekinshi buryshyna jetý qıyn. Onyń ústine kepteliske qalsańyz, onda kóp kútýge týra keledi. Sondyqtan aıaq jetpeıtin jerge kýrerdiń shamasy jetip tur. Osydan birneshe jyl buryn elimizge «Iandeks», Glovo jáne Wolt sıaqty servıstik kompanıalary kire bastady. Buryn tek Chocofood bar edi. Karantınge deıin sary, qyzyl, kógildir jáne jasyl sómke asynǵan jas jigitter qala peızajynyń daǵdyly bóligine aınaldy. Al lokdaýn kezinde kópshilik úshin kýrerler azyq-túlikti, taǵam men dári-dármekti jetkizip beretin jalǵyz múmkindik boldy. Bir ǵana Glovo kompanıasynyń ózinde Almatyda shamamen 3500-ge astam shabarmany bar eken. Bul stýdentterge taptyrmas jumys kúshi bolyp tur. Ata-anasyna qol jaımaı, óz nápaqasyn taýyp, qarjy jasap júr. Naǵyz quptarlyq is.
Báseke dáýiri bastaldy
Qazir neǵurlym eńbekti nátıjeli isteseńiz, soǵurlym tabys artyq túsedi. Baıaǵyda aýylda júrgende egin-tegin, mal-múlikke qarap kún kóretin edik. Bireýmen ekinshi kisi jaryspaıtyn. Jurttyń hal- ahýaly teńdeı-tuǵyn. İlýde bireý baı bolmasa, jappaı jantalasý joq edi. Osylaısha kúnder ótti. Beıqam kez eshkimdi alańdatpady. Sodan álgi ata-analardyń bala-shaǵasy jetildi. Qalaǵa kelýshiler qatary artty. Sóıtip, qyzý tirshilik bastaldy.
Shyny kerek, buryn eshkim dúnıe tabýdy oılaı qoımady. Ómirbaqı aýylda kún kóremiz dep oılaǵan bolýy kerek. Áıtse de, urpaq aýysqan saıyn báriniń oı-órisi ózgeredi. Jastar óziniń áke-sheshesi sıaqty bolǵysy kele bermeıdi. Alyp shaharda turyp, baspana, táýir kólik satyp alyp jetilgisi keledi. Múmkin bolsa, bıznespen shuǵyldanyp júredi. Áıteýir qarap jatpaıdy. Sondyqtan balany aýylda ustap, qasymnan shyqpa deıtin dáýren kelmestiń kemesine minip ketken. Sol sebepti, jastardy buǵattap, jolyn bógegen jón emes.
Qazir kimnen surasań da báriniń aıtary, otbasynda jaǵdaıy bolmaǵan. Sóıtip, aǵaıyn-týysqa salmaq salmaıyn dep óz jónimen kún kórip ketken. Iá, qıynshylyq, toqyraý jyldar ótti. Alaıda, zaman ońalǵanda úı-jaı salýǵa bolar edi ǵoı. Kóbisi qoldan qysh quıyp, birneshe jyl qurylys materıaldaryn jınady. Sóıtip, bas-aıaǵy 2-3 jylda úlken úı saldy. Endi osyndaıǵa qarap qalaı súısinbeısiz?! Dáp osyndaı jaǵdaı ózimizdiń basymyzda da bar. Bir túsingenim, únemi bir jerden shyqpaǵan adam basqasha oılaı da almaıtyn sıaqty. Óıtkeni, damý, kórkeıý týraly aıta qalsań, at tonyn ala qashady. Al odan keıin qaıtip damý bolsyn. Osyndaıdy jasóspirim shaǵynan kórgen bala ol jerde eshqandaı órkendeý joqtyǵyn túısinip, óz jolyn taýyp ketedi. Bir sózben aıtqanda, «qoly qımyldaǵannyń aýzy qımyldaıdy» demekpiz.
Smartfon naǵyz kómekshige aınaldy
Naǵyz arpalys ǵasyryn osy shahardan baıqaı alamyz. Tańnan keshke deıin jumysqa jegilgen bir adam. Bári qarbalas. Bir-birimen talasqanda jaǵańdy ustaısyń. Biraq amal bar ma, óıtip-búıtip kún keshý kerek. Bul ómirdiń jazylmaǵan zańy.
Almatyǵa eń eńbekqor jandar oqýǵa túsetin sıaqty. Kimdi qarasań da, qarap júrgen joq. Jastar jan-jaqty. Oqýdan shyǵyp, jetkizýshi, daıashy, kúzetshi, kólik jýýshy, aspaz jáne t.b. isterdi atqara beredi. Maqsat – óz-ózine qarjy tabý, eshkimge alaqan jaımaý.
Bizdiń kózimizge eń kóp túsetin, ol – kýrer. Onyń qyzmetin qazaqsha túrli atap júrmiz. Iaǵnı atshabar, shabarman, jetkizýshi dep qoıamyz. Qalaı atasaq ta, qyzmeti bir ǵoı. Sonymen dereý zat, qujat, as- aýqat, sýsyn – túrli-túrli nársege muqtaj bolyp qalamyz. Ózimiz baraıyn desek, ýaqyt joq. Sóıtip, jetkizý qyzmetine júginemiz. Qolymyzdaǵy smartfon naǵyz kómekshige aınaldy. Soǵan belgili bir mekenjaıdy teremiz, aqyrynda oılaǵan tapsyrysty ákelip beredi. Baǵasy árkimge ártúrli bolar. Alaıda, taptyrmas kómekshi der edik.
Sońǵy kezderi kýrer qyzmetine qatysty zańnamalyq turǵyda birqatar jumystar qolǵa alyndy. Sondaı-aq, jol erejesi jáne t.b. problemalar oqtyn-oqtyn estilip qalyp jatyr. Bári óz jónimen rettelse eken.
Almaty shahary stýdentterge toldy. Tipti sheteldikter de jeterlik. Osy maqalany jazarda baıqaǵanymyz, ózbek, qyrǵyz, tájik aǵaıyndardan kelip oqıtyn shákirtter de servıstik qyzmetterde júr. Biraq sózge tartyp edik, jolamady. Ne úshin ekeni túsiniksiz?! Tildi úırenip alǵan, tipti keıbirin bizdiń jigitterden ajyrata almaısyz.