Almatyda kóriktendirýdiń jańa erejesi bekitildi.
Qujat eldi meken aýmaqtaryn kóriktendirýdiń respýblıkalyq úlgilik qaǵıdasyna sáıkes ázirlendi jáne qalalardyń qazirgi zamanǵy qajettiligin kórsetedi, dep habarlaıdy Almaty-akshamy.kz
Ózgeristiń biri qurylys jumystaryn júrgizý oryndaryn kútip ustaý jónindegi sharalardy kúsheıtý.
Almatynyń komýnaldyq ınfraqurylymdy damytý basqarmasynyń basshysy Dýlat Áshkenovtyń aıtýynsha, menshik ıeleri qurylys alańdarynyń qorshaýynyń durystyǵy men tazalyǵyn qamtamasyz etýge tıis. Olarda bóten jazýlar men sýretter, habarlandyrý men jarnama jazylǵan paraqshalar bolmaýǵa tıis. Sondaı-aq, jalpy qala joly lastanbas úshin qurylys alańdarynda qatty jabyny bar kirme joldar jabdyqtalýy kerek.
Qurylys-jóndeý jumystary aıaqtalǵannan keıin kóriktendirý elementiniń buzylǵan tutastyǵy merdigerlik uıymnyń esebinen qalpyna keltirilýge tıis. Sondaı-aq, qoqysty tasymaldaýǵa jáne sýsymaly júkterdi brezentpen nemese basqa materıalmen jappaı, ashyq kúıinde áketýge tyıym salynady.
Buǵan qosa, ýaqytsha qurylysqa qoıylatyn talaptar naqtylandy, qurylys ornyn jınaǵan soń ıesi buryn alyp jatqan jer ýchaskesin qalpyna keltirýge jáne kóriktendirýge mindetteledi. Ýaqytsha qurylystyń menshik ıelerine kúnqaǵar men shatyr salýǵa, ydys pen taýardy negizgi emes nysannyń janyna jáne onyń shatyryna jınaýǵa tyıym salynady. Sonymen qatar, ýaqytsha qurylys arasyndaǵy órtke qarsy alshaqtyqty jabdyqpen nemese qaldyqpen toltyrýǵa bolmaıdy.
«Bul ereje «Taza Qazaqstan» respýblıkalyq aksıasyn ótkizý ıdeıasyna engizilgen qalanyń qajettiligin kórsetedi. Bul mádenıetti arttyrý, óziniń jeke ýchaskesin, úı mańyndaǵy aýmaqty kútip ustaý, sondaı-aq qurylys jumystaryn júrgizý. Ereje basshylyq qujat retinde qalasyna, turyp jatqan aýdanǵa, shaǵyn aýdanǵa, ortaǵa degen durys kózqaras tanytýǵa baǵyttalǵan», - deıdi Dýlat Áshkenov.
Bekitilgen erejege túsinikteme bergen qalanyń máslıhat depýtaty Dıana Erlan qabyldanǵan sharalar Almatyda ómir súrý sapasyna oń áser etetinin atap ótti.
«Kóriktendirýdiń jańa erejesi qalamyzdyń ózgelerge úlgi bolýyna kómektesetinine senimdimin. Árbir turǵynnyń tazalyq pen tártipti saqtaýdaǵy rólin túsinýi mańyzdy. Tek birlesken kúsh-jigerdiń arqasynda barlyǵyna shynymen de qolaıly jaǵdaı jasaı alamyz», - dedi ol.
Esterińizge sala keteıik, 2024 jylǵy 19 shildede VIII saılanǵan máslıhattyń kezekten tys HHİ sesıasynda depýtattar Almaty qalasynyń aýmaǵyn kóriktendirýdiń jańa erejesin bekitti. Bul sharalar qaýipsiz, yńǵaıly ári ekologıalyq qolaıly qalalyq orta qurýǵa baǵyttalǵan.