Almaty kitaphanalaryna 40 jyl: avtomattandyrý, ınklúzıa jáne kreatıvti jobalar
Almatyda 2030 jylǵa deıin taǵy 20 jańa kitaphana ashylady. Bul rette kitaphana tapshylyǵy baıqalatyn qalanyń shalǵaı aýdandaryna mán beriletin bolady. Sonymen qatar, saıabaqtarda, skverler men saýda ortalyqtarynda kitaphana pavılondary men apparattary paıda bolady. Iaǵnı, kóshilik qazir apparat arqyly kofeni ózbetinshe jasap, ózimen alyp ketip júrse, aldaǵy ýaqytta avtomattandyrylǵan apparattan kitapty tegin alyp, oqyǵan soń qaıta kitaphanaǵa qaıtara alady. Osylaısha, Almaty osyndaı kreatıvti joba usynyp, júzege asyrýǵa daıyn alǵashqy qala bolmaq. Mádenıet basqarmasy BAQ ókilderine kitaphanalar boıynsha pres-týr uıymdastyryp, saladaǵy osy jáne basqa da jetistikter týraly aıtyp berdi. Aıta keteıik, bıyl Almaty kitaphanalarynyń qurylǵanyna 40 jyl toldy.
Qazir mádenı astanada qala ákimdigine qarasty 28 kitaphana bar. Onyń úsheýi táýlik boıy jumys isteıdi. Oqyrmandar úshin barlyq kitaphanalarda qolaıly jaǵdaı jasalǵan: kitap qory únemi jańartylyp otyrady, tegin wi-fi jumys isteıdi, kompúterler ornatylǵan, jańa jumys ústelderi, dıvandar men pýfıkter syndy jıhazben qamtylǵan. Sonymen qatar, birneshe kitaphanada kórý qabileti nashar nemese zaǵıp oqyrmandarǵa arnalǵan Braıl pernetaqtalary da ornatylǵan. Braıl júıesiniń qozǵalmaly núkteleri arqyly zaǵıp oqyrman kitap mátinin saýsaqpen sezip oqı alady. Ol úshin kez kelgen kitaptaǵy mátindi arnaıy qurylǵy arqyly skanerlep, kompúter ekranyna úlkeıtip shyǵaraby. Sondaı-aq mátindi qulaqqappen aýdıo retinde tyńdaýǵa da bolady.
«Biz qalamyzdaǵy zaǵıptar qoǵamymen, sondaı-aq túrli ınklúzıvti uıymdarmen tyǵyz yntymaqtastyq ornatyp jatyrmyz. Sonymen qatar, balalardyń kitap oqýǵa degen yntasyn arttyrý boıynsha jumystardy belsendi júrgizip kelemiz. Ol úshin tegin til úıirmelerin, geımıfıkasıa elementteri bar túrli is-sharalar uıymdastyramyz, tipti juldyzdar men jazýshylardy shaqyryp, ádebı keshter ótkizemiz. Bizde barlyǵy 140 tegin úıirme bar. Jalpy, qalalyq kitaphanalardyń 95%-y jańǵyrtýdan ótti. Bizdiń árbir kitaphanamyz balalar men eresekter úshin jan-jaqty damý ortalyǵyna aınalǵan. Osynyń arqasynda qalalyq kitaphanalarǵa oqyrmandar jyl saıyn kem degende 3 mıllıon ret kelip-ketedi», - dep atap ótti Almaty qalasynyń Ortalyqtandyrylǵan kitaphana júıesiniń dırektory Meıram Bektembaev.
Qalanyń ortalyqtandyrylǵan kitaphana júıesiniń kitap qory 1 300 000 danadan asady, onyń 18% - y tolyǵymen sıfrlandyrylǵan. Sonymen qatar, kitaptar katalogy OKJ saıtynda ornalastyrylǵan jáne barlyǵyna qoljetimdi. Sondaı-aq, qazirgi ýaqytta múmkindigi shekteýli azamattar úshin úıge kitap jetkizý qyzmeti testileýden ótkizilýde.
Baspasóz týry barysynda jýrnalıser kitaphana qyzmetkerlerimen sóılesip, túrli fılıaldarǵa bardy, qorda saqtalǵan basylymdarmen de tanysty. № 10 kitaphana meńgerýshisi Nadejda Ten halyqaralyq yntymaqtastyq aıasyndaǵy jobalar týraly aıtty. Almaty kitaphanashylary bıyl Shveısarıa, Germanıa, Japonıa, Ońtústik Koreıa jáne Grýzıanyń jetekshi kitaphanalarynda biliktiligin arttyryp, oqýdan ótti.
«Qala basshysy men mádenıet basqarmasy bizdiń salamyzdy damytýǵa qatysty máselelerge aıtarlyqtaı kóńil bóledi. Ásirese – qyzmetkerlerdiń biliktiligin arttyrý, jumysqa qolaıly jaǵdaı jasaýǵa erekshe mán berip keledi. Biz alǵash ret álemniń jetekshi bilim berý ortalyqtary men kitaphanalarynda oqýǵa múmkindik aldyq. Men ózim Ońtústik Koreıada taǵylymdamadan óttim. Biz Starfıld, Namsan sıaqty áıgili kitaphanalarǵa, sondaı-aq ýnıversıtetter men balalar kitaphanalaryna bardyq. Oqý aıaqtalǵan soń, biz áriptesterimizben alǵan barlyq bilimimizdi ózara saralap, áserlerimiz týraly aıttyq. Shetelde alǵan bilimimiz ben jańa ıdeıalarymyzdy ákimdik qalalyq kitaphanalarǵa engize bastady. Bul rasynda keremet nátıje», - dep bólisti ol.
Qazir qalalyq kitaphanalarda avtomattandyrylǵan aqparattyq-kitaphanalyq júıe iske qosyldy, ony engizý arqyly birqatar jańa múmkindikter paıda boldy. Máselen, elektrondyq oqyrman bıletin shyǵaryp berý, oqyrmandardyń suranystaryn óńdeý, qajetti ádebıetterdi irikteý, tapsyrys berý jáne rezervteý, kitaptardy avtomattandyrylǵan rejımde berý jáne qaıtarý, kitaphanalyq-aqparattyq tehnologıalardy keshendi avtomattandyrý.