Almatyda 2030 jylǵa deıin taǵy 20 jańa kitaphana ashylady.
Bul rette jospar qalanyń kitaphana tapshylyǵy bar shalǵaı aýdandaryna baǵyttalatyn bolady, dep habarlaıdy akshamnews.kz
Sonymen qatar, saıabaqtarda, skverlerde jáne saýda ortalyqtarynda kitaphana pavılondary ashylatyn bolady. Osylaısha, Almaty bizdiń elimizde mundaı rýhanı jobany josparlap usynýǵa daıyn alǵashqy qala bolyp otyr.
Bul oraıda Mádenıet basqarmasynda kitaphana salasy men basqa da shyǵarmashylyq sheshimder týraly aıtyldy. BAQ ókilderi úshin kitaphanalar boıynsha baspasóz týry uıymdastyryldy. Aıta keteıik, bıyl Almaty kitaphanalary 40 jyldyǵyn atap ótýde.
Qazir mádenı astanamyz Almatyda 28 qalalyq kitaphana bar. Onyń ishinde úsh fılıal táýlik boıy jumys isteıdi. Oqyrmandar úshin qolaıly jaǵdaılar
jasalǵan: kitap qory únemi jańartylyp otyrady. Munda jyldam tegin ınternet jumys isteıdi, kompúterler, jumys ústelderi bar.
Sonymen qatar, kórý qabileti nashar jáne zaǵıp oqyrmandar kitaphanalardyń arnaıy qyzmetterin paıdalana alady. Ol úshin «Braıl» pernetaqtalary, arnaıy ekrandyq úlkeıtkishter jáne skanerler bar. Olar kitaptardyń mazmunyn birden «braılǵa» aýdarýǵa kómektesedi.
«Biz qalamyzdyń zaǵıptar qoǵamymen, sondaı-aq túrli ınklúzıvti uıymdarmen tyǵyz yntymaqtastyq jasaımyz. Sonymen qatar, balalardyń kitap oqýǵa degen yntasyn arttyrý boıynsha jumystar júrgizilýde. Ol úshin tegin til úıirmelerin, geımıfıkasıa elementteri bar túrli is-sharalardy uıymdastyramyz, zıaly tulǵalardy, óner juldyzdary men qalamgerlerdi shaqyramyz. Bizde barlyǵy 140 úıirme bar. Jalpy, qalalyq kitaphanalardyń 95% - y jańǵyrtýdan ótti. Árbir kitaphanamyz balalar men eresekter úshin jan-jaqty damý ortalyǵy bolyp tabylady. Osynyń arqasynda qalalyq kitaphanalarǵa kelýshiler sany jyl saıyn 3 mıllıonnan kem emes", - dep atap ótti Almaty qalasynyń ortalyqtandyrylǵan kitaphana júıesiniń dırektory Meıram Bektembaev.
Qalanyń ortalyqtandyrylǵan kitaphana júıesindegi kitap qory 1 300 000 danadan asady, onyń 18% - y tolyǵymen sıfrlanǵan. Sonymen qatar, kitap katalogy OKJ saıtynda ornalastyrylǵan jáne barlyq oqyrmanǵa qoljetimdi. Sondaı-aq, qazirgi ýaqytta múmkindigi shekteýli azamattar úshin úıge kitap jetkizý qyzmeti testileýden ótip jatyr.
Baspasóz týry barysynda jýrnalıser kitaphana qyzmetkerlerimen júzdesip, túrli fılıaldarǵa baryp, qorda saqtalǵan basylymdarmen tanysty. № 10 kitaphana meńgerýshisi Nadejda Ten kitaphanalardyń halyqaralyq yntymaqtastyǵy týraly aıtyp berdi. Almaty kitaphanashylary bıyl Shveısarıa, Germanıa, Japonıa, Ońtústik Koreıa jáne Grýzıanyń jetekshi kitaphanalarynda biliktiligin arttyrýdan ótti.
«Kitaphanashylardyń biliktiligin arttyrý jáne tájirıbe almasý maqsatynda qyzmetkerlerimiz álemniń jetekshi bilim berý ortalyqtary men kitaphanalaryna taǵylymdamadan ótýge jáne oqýǵa jiberiledi. Men ózim Ońtústik Koreıada taǵylymdamadan óttim. Biz Starfıld, Namsan sıaqty áıgili kitaphanalarǵa, sondaı-aq ýnıversıtet pen balalar kitaphanalaryna bardyq. Kelgennen keıin alǵan barlyq bilimimizdi salystyryp, óz áserlerimizben bólistik. Shetelde alǵan ıdeıalarymyz ben bilimderimizdi Ákimdik qalalyq kitaphanalarǵa engize bastady. Bul keremet»,- dedi ol.
Qazir qalalyq kitaphanalarda avtomattandyrylǵan aqparattyq-kitaphanalyq júıe iske qosyldy, ony engizý nátıjeli múmkindikterge jol ashty. Máselen, elektrondyq oqyrman bıletin berý, oqyrmandardyń suranystaryn óńdeý, qajetti ádebıetterdi irikteý, tapsyrys berý jáne rezervteý, kitaptardy avtomattandyrylǵan rejımde berý jáne qaıtarý, kitaphanalyq-aqparattyq tehnologıalardy keshendi avtomattandyrý júıeleri iske qosyldy.