Almaty JEO-2-ni jańǵyrtý jobasyna sáıkes, elektr qýaty 600 MVt-ǵa deıingi jáne jylý qýaty 957 Gkal/saǵ deıingi gaz týrbınaly JEO salý kózdelip otyr
Búgin Almaty qalasynda gazben janatyn jańa Almaty JEO-2-ni salýshy merdigermen shartqa qol qoıyldy, dep habarlaıdy Almaty-akshamy.kz.
EPC-kelisimshart jobalaý, jabdyqty jetkizý, qurylys-montajdaý jáne iske qosý-retteý jumystary, paıdalanýǵa berý sıaqty jumystyń tolyq sıkliniń oryndalýyn bildiredi. Jańa stansıa jumys istep turǵan JEO alańyna salynady, onda búgingi kúni negizgi otyn retinde kómir, al iske qosar kezde mazýt paıdalanylady.
Jańa gaz-týrbınalyq JEO-ny salýshy merdiger energetıka salasyndaǵy «Dongfang Electric International Corporation», «Powerchina Sepco1 Electric Power Construction Co., Ltd», «Powerchina Hebei Electric Power Engineering Co., Ltd» jobalaryn iske asyrýǵa mamandandyrylǵan úsh iri qytaılyq kompanıalar konsorsıýmy boldy. Konsorsıým degenimiz – kompanıalar odaǵy, olardyń birinshisi – ónerkásiptik jabdyqtardyń iri óndirýshisi, ekinshisiniń jobalardy ERS-sharttary boıynsha iske asyrý tájirıbesi bar, úshinshisi – jobalaý jumystaryna mamandanǵan kompanıa.
Bul tańdaý «Almaty JEO-2-ni qorshaǵan ortaǵa áserin barynsha azaıta otyryp, jańǵyrtý» jobasy sheńberinde Eýropa qaıta qurý jáne damý bankiniń (EQDB) halyqaralyq standarttary men qaǵıdalary boıynsha ótken eki kezeńdi ashyq halyqaralyq tenderdiń qorytyndylarymen aıqyndaldy. Esterińizge sala keteıik, EPC merdigerin anyqtaýǵa arnalǵan tender ótken jyldyń qazan aıynda jarıalanǵan bolatyn. 2023 jyldyń qańtarynda konkýrstyń 1-kezeńine qatysýshylardyń ótinimderi (biliktilikti irikteý) ashyldy. Barlyǵy 6 qatysýshydan ótinimder kelip tústi. Tenderdiń 2-kezeńi aıasynda eki ótinim qaraldy. Nátıjesinde, EQDB erejelerine sáıkes, konkýrs ótti dep sanalady jáne bank 2023 jyldyń mamyr aıynyń sońynda onyń jeńimpazy – úsh qytaılyq kompanıanyń konsorsıýmyn rastady.
EPC-kelisimshartqa qol qoıý Almaty JEO-2 aýmaǵynda, jańa stansıaǵa bólingen jerde ótti. İs-shara «Samuryq-Qazyna» qory, QR-daǵy QHR Elshiligi, QR Energetıka mınıstrligi, Almaty qalasy ákimdigi, «Samuryq-Energo»AQ ókilderiniń qatysýymen ótti. Tapsyrys berýshi tarapynan kelisimshartqa «Almaty elektr stansıalary» AQ (AlES) Basqarma Tóraǵasy Eran Qyrqynbaev, merdiger tarapynan – Szán Lısán myrza, «Dongfang Electric International Corporation» kompanıasynyń halyqaralyq marketıń bólimi bas dırektorynyń orynbasary qol qoıdy.
Almaty JEO-2-ni jańǵyrtý jobasyna sáıkes elektr qýaty 600 MVt-ǵa deıingi jáne jylý qýaty 957 Gkal/saǵ deıingi gaz týrbınaly JEO salý kózdelip otyr. Stansıaǵa gaz týrbınalyq bloktardyń korpýsy men sý jylytý qazandyǵy kiredi.Jobanyń maqsaty - JEO-2-ni tabıǵı gazdy jaǵýǵa aýystyrý esebinen stansıanyń Almaty qalasynyń ekologıalyq jaǵdaıyna teris áserin azaıtý. Jobany aıaqtaý jáne stansıany paıdalanýǵa berý 2026 jyldyń jeltoqsanyna josparlanýda.
«Samuryq-Energo» AQ Basqarma Tóraǵasy Serik Túıtebaevtyń aıtýynsha, Almatynyń eki stansıasy – JEO-2 jáne JEO-3 jańǵyrtylǵannan, qaıta jańartylǵannan jáne gazǵa aýystyrylǵannan keıin qala atmosferasyna zıandy zattardyń shyǵaryndylary 92%-ǵa tómendeıdi. Tómendeýge Eýropalyq odaqtyń talaptary deńgeıinde atmosferaǵa zıandy zattardyń shyǵarylýyn qamtamasyz etetin tıimdi gaz týrbınaly qondyrǵylarda tabıǵı gazdy paıdalaný esebinen qol jetkiziletin bolady. Sonymen qatar, kómirdiń negizgi otynyn gazǵa aýystyrý nátıjesinde kúl-qoj qaldyqtarynyń túzilýi men kómilýi alynyp tastalady. Qoldanystaǵy kúl úıindisiniń ornynda óndiristik aǵyndardy kádege jaratý úshin býlaný alańdary kózdeledi.
Sondaı-aq, «Samuryq-Energo» AQ mamandarynyń aıtýynsha, joba Qazaqstannyń ońtústik aımaǵyndaǵy elektr qýaty naryǵynyń tapshylyǵyn jabýǵa baǵyttalǵan.
2022 jyldyń qarashasynda stansıa ıesi AlES pen EQDB arasynda Jobany qarjylandyrý týraly nesıelik kelisim jasaldy. Jalpy, jobany qarjylyq qoldaýdy EQDB-dan basqa Azıa Damý Banki (ADB) jáne «Qazaqstannyń Damý Banki» AQ (QDB) kiretin halyqaralyq jáne qazaqstandyq qarjy qurylymdary júzege asyratyn bolady. ADB jáne QDB-men tıisti qujattarǵa qol qoıý 2023 jylǵy maýsymǵa josparlanyp otyr. Qarjylandyrý «Samuryq-Qazyna» qorynyń korporatıvtik kepildikterimen júzege asyrylady, bul sarapshylardyń baǵalaýy boıynsha táýekelderdi azaıtýǵa jáne kredıtteý sharttaryn jaqsartýǵa yqpal etedi.