Pedıatrıa ortalyǵynda jylyna elimizdiń ár óńirinen 6000-ǵa jýyq bala em alady
1 maýsym kúni Pedıatrıa jáne balalar hırýrgıasy ǵylymı ortalyǵynda Halyqaralyq balalardy qorǵaý kúnine oraı, qaterli dertke jáne sırek kezdesetin aýrýlarǵa shaldyqqan balalar úshin merekelik shara ótedi, dep habarlaıdy Almaty-akshamy.kz.
Sharanyń basty maqsaty – onkologıalyq dertke shaldyqqan balalarǵa mereke, qýanysh syılaý, «aty jaman» aýrýdy jeńýge degen senim uıalatý, kóńilderin kóterý arqyly bir sátke aýrýyn umyttyrý, ata-analar men balalarǵa psıhologıalyq qoldaý kórsetý. Pedıatrıa ortalyǵynda jylyna elimizdiń ár óńirinen 6000-ǵa jýyq bala em alady, onyń 2500-den astamy onkogematologıalyq aýrýlarǵa shaldyqqan balalar.
Sharaǵa ortalyqtyń dárigerleri, psıhologtary men tárbıeshileri jáne onkogematologıa bólimderinde em alyp jatqan kishkentaı pasıentter qatysady. Balalardy quttyqtaýǵa qazaq estradasynyń juldyzdary Jolbarys Seıfýllın men Allabergen Jaqsybaev, «Braz sıkstet» orkestri, «Shý-SHý» aspaptyq dýeti, «Ýlmıra» shoý-baleti jáne sıqyrshy-fokýsnık Panov Vladıslav arnaıy keledi. Óner juldyzdarymen birge ortalyqta em alyp jatqan balalar da óner kórsetedi.
Shara aıasynda balalardyń sýret kórmesi, jyl saıynǵy asfáltqa sýret salý baıqaýy, keskindeme boıynsha sheberlik synyby ótedi. Balalar úshin arnaıy akvagrım men fotosessıalar uıymdastyrylady. Ortalyqtyń Kroha esimdi aýrýhana kloýny balalarǵa arnalǵan arnaıy baıqaýlar men qyzyqty oıyndar ótkizedi. Sharaǵa arnaıy shaqyrylǵan 5 anımatorlar toby balalarǵa merekelik kóńil-kúı syılaıtyn bolady. Sonymen qatar, Qazaqstan qor bırjasynyń erikti anımatorlarynyń daıyndaýynda fleshmob ótkizý josparlanýda. İs-shara shaǵyn dıskotekamen jáne balalarǵa arnalǵan merekelik syılyqtardy tabystaýmen aıaqtalady.
Shara «Asyl bala», «Help Today», «Amıla», «Jańa Ómir» qaıyrymdylyq qorlary men Qazaqstan qor bırjasy jáne «Eır Astana» kompanıasynyń demeýshiligimen ótedi.