«Almaty jastary» jeńildikpen nesıelendirý qalalyq baǵdarlamasynyń aldyn ala qorytyndylary shyǵaryldy. Ótinishter men qujattardy qabyldaý www.almaty-zhastary.kz saıtynda a 18 mamyrdan 1 maýsymǵa deıin júrgizildi. Ótinish berý kezeńinde qatysýshylar qujattaryn óńdep, tolyqtyra aldy dep habarlaıdy almaty-akshamy.kz
«Almaty jastary» baǵdarlamasyna barlyǵy 11 199 ótinish tústi:
- densaýlyq saqtaý - 3096;
- bilim berý – 3943;
- mádenıet – 453;
- sport - 136;
- JOO men ǴZI – 1208;
- áleýmettik sala - 1384;
- BAQ - 187;
- quqyq qorǵaý organdary - 792.
2 maýsymda barlyq ótinishter men qujattardy qaraý bastaldy. 20 jumys kúni ishinde ótinishterdiń baǵdarlama talaptaryna sáıkestigi tekseriledi. Osydan keıin ár sala boıynsha eń kóp upaı sany boıynsha tizim jasalady:
- tirkelgen nekede ár jyl úshin – 1 bal;
- 1 (bir) bala bolǵan jaǵdaıda – 1 bal;
- osy sanattaǵy (saladaǵy) jumys ótiliniń ár jyly úshin - 2 bal;
- HÁOT tıesililigi úshin - 5 bal.
Ashyqtyq pen ádildik úshin rezervke engizilgen jáne qabyldanbaǵan qatysýshylardyń tizimi saıtta jarıalanady.
İriktelgen úmitkerler jeke kabınetinen «Otbasy bank» AQ-ǵa joldama beriledi. 15 jumys kúni ishinde olar tólem qabilettiligin baǵalaýdan ótý úshin «Otbasy bank» AQ-nyń kez kelgen qyzmet kórsetý ortalyǵyna júgine alady.
Tólem qabilettiligin rastaǵan qatysýshylar 45 kúntizbe ishinde bastapqy nemese ekinshi naryqtaǵy turǵyn úıdi tańdaýy tıis. Turǵyn úıge arnalǵan qujattar turǵyn úı zaemyn berý múmkindigin qaraý úshin «Otbasy bank» AQ-ǵa usynylady.