Erevanda grek-rım jáne erkin kúresten ótken 37-shi álem birinshiliginde armıa sportshylary úsh altyn jáne tórt qola enshiledi.
Jeńimpazdar men júldegerlerdi Armıa ortalyq sport klýbynyń basshylyǵy, áskerı qyzmetshiler men týǵan-týystary kútip aldy, dep habarlaıdy aqshamnews.kz Qorǵanys mınıstrligine silteme jasap.
Armenıa astanasynda grek-rım jáne erkin kúresten ótken CISM álem chempıonatyna álemniń 24 elinen 400 sportshy jınaldy. Qazaqstan Armıa ortalyq sport klýbynyń atynan chempıonatqa 17 ásker balýany shyqty.
Jekpe-jektiń nátıjeleri boıynsha erkin kúres sheberleri, QR Qarýly kúshteriniń qyzmetkeri Kamıl Kýrýglıev (97 keli) jáne efreıtor Meıirjan Áshirov (70 keli) tuǵyrdyń eń joǵarǵy satysynan kórinip, chempıon atandy. 130 keli salmaqta grek-rım stılinde kúresken sportshy efreıtor Álimhan Syzdyqovqa qarsylas shaq kelmedi.
– Qarsylastar myqty boldy, jaqsy daıyndalǵandary kórinip tur. Álemdik arenada el namysyn abyroımen qorǵaǵanyma qýanyshtymyn. Tynymsyz jattyǵýlardyń nátıjesi de jaqsy boldy. Bizdi qoldaǵandardyń barlyǵyna alǵys aıtamyn, – dedi chempıon Meıirjan Áshirov.
Birinshiliktiń qorytyndysy boıynsha grek-rım stılindegi balýan kishi serjant Aıdos Sultanǵalı (60 keli) jáne QR Qarýly kúshteriniń qyzmetkeri Rústem Myrzaǵalıev (86 keli) qola medaldarǵa ıe boldy. Áıelder kúresinde úshinshi oryn QR Qarýly kúshteriniń qyzmetkerleri Svetlana Ankıcheva (50 keli) jáne Marına Sedneva (55 keli) ıelendi.
– Sportshylarymyzdyń jeńisi Memlekettik Týdyń kóterilip, Qazaqstan ánurany oryndalǵan kezde erekshe seziledi eken. Biz úshin bul sát tebirenerlik maqtanyshqa toly boldy. Chempıondarymyzǵa zor eńbegi, erik-jigeri men batyldyǵy úshin rahmet aıtamyn, – dedi Qorǵanys mınıstrligi AOSK (Almaty fılıaly) – Sport komıteti oqý-jattyǵý ortalyǵynyń bastyǵy maıor Berden Aqpanbekov.