Búgingi tańda Almaty qalasy gazdandyrý deńgeıi boıynsha elimizde birinshi orynda. Shamamen 2 mln turǵyn tabıǵı gazǵa qol jetkizgen, dep habarlaıdy Almaty-akshamy.kz Inform.kz-ke silteme jasap.
Qalany gazdandyrý «QazTransGaz Aımaq» Almaty óndiristik fılıalynyń ınvestısıalyq baǵdarlamasy sheńberinde júzege asyrylyp jatyr. «2017-2021 jyldarǵa arnalǵan ınvestısıalyq baǵdarlama sheńberinde 12 mlrd teńge qarjylandyrý somasyna 265 km gaz qubyry salyndy, 114,4 km qoldanystaǵy gaz qubyry rekonstrýksıalandy, 40 shkaftyq gaz retteý pýnkti, 3 gaz retteý blok pýnkti jáne 63 birlik elektr-hımıalyq qorǵaý stansıalary ornatyldy»,- dedi brıfıń barysynda QR Energetıka mınıstri Bolat Aqsholaqov.
Mınıstrdiń aıtýynsha, bul sharalar senimdi tasymaldaýdy qamtamasyz etip qana qoımaı, 4 myń jańa abonentti gazben qamtýǵa múmkindik berdi. 2022 jyldyń 1 qańtarynan beri 2124 úı qosyldy, bul qalanyń ekologıalyq jaǵdaıyn jaqsartýǵa oń áserin tıgizýde.
«2022-2026 jyldarǵa arnalǵan jańa ınvestısıalyq baǵdarlama 15,2 mlrd teńge mólsherinde bekitildi. Investısıalyq baǵdarlama: - uzyndyǵy 158 shaqyrym gaz qubyrlaryn rekonstrýksıalaýǵa; - qosymsha 355 abonentti gazben qamtamasyz etý úshin uzyndyǵy 113 shaqyrym jańa jeliler salýǵa; - 111 birlik elektr-hımıalyq qorǵaý stansıalaryn jáne 53 birlik shkaftyq gaz retteý pýnktterin rekonstrýksıalaýǵa baǵyttalǵan», - deıdi mınıstr.