Búgin jáne erteń — eki kún boıyna saltanat quratyn Almaty Food Fest atty “tátti de dámdi” halyqaralyq gastronomıalyq festıvál Respýblıka saraıynyń aldyndaǵy Abaı alańyn sán-saltanatqa bóleýde.
Festıválge álemniń san túrli asqanalarynyń taǵamyn usynatyn 50-ge jýyq meıramhana men 30-dan astam fermerlik jáne hand-made dúńgirshekteri qatysýda. İs-shara qonaqtary arasynda baıqaýlar, túrli utys oıyndary ótýde. Almatylyqtar men qala meımandary sheberlik dáristerine de qatysyp, aspazdyq shoý men mýzykalyq qoıylymdardy tamashalaı alady.
Festıválde sheteldik taǵamdardan jáne álbette, qazaqtyń ulttyq taǵamdarynan da dám tatýǵa bolady. Al balalar úshin anımatorlar óner kórsetetin arnaıy aımaq uıymdastyrylǵan.
Almaty Food Fest festıvali bıyl úshinshi ret ótýde. Bıylǵy festıválde Shanhaı yntymaqtastyq uıymy elderiniń aspazdary arasynda ótetin qyzyqty barbekú baıqaýy is-sharanyń tuzdyǵy bolatyn sekildi.
«Halyqaralyq gastronomıalyq festıvál sheteldik qonaqtar men qala turǵyndaryna elimizdiń tarıhyn, mádenıetin, dástúrin jáne salt-dástúrin, ómir saltyn jaqsyraq túsinýge múmkindik beredi. Buǵan qosa, festıvál Almatyny álemniń gastronomıa kartasynda nasıhattaýǵa úles qosyp, ishki jáne syrtqy týrızmdi damytýǵa, sondaı-aq elimizge tanymal halyqaralyq meıramhana reıtıńteriniń ókilderin tartýǵa septigin tıgizedi», – deıdi fransýzdyq bas aspaz Jerom Kýstıas.
Almaty qalasynyń Týrızm basqarmasy Almaty Food Fest – 2024 festıvaline eki kún ishinde 15 myńnan astam adam qatysady dep boljap otyr.
“Bizdiń La Tartine dástúrli fransýz nan ónimderin pisiredi. Tátti toqashtarymyz ashytqysyz, erekshe reseptpen daıyndalady. Almatynyń barlyq saýda-oıyn-saýyq ortalyǵynda satylady. Bul halyqaralyq festıválge birinshi ret qatysyp turmyz. Bizdiń nan ónimderinen otandastarymyzben birge sheteldik meımandar da aýyz tıip, dámine tamsanyp jatsa, qýanamyz”, — deıdi gastrofestıvalge ystyq nan ónimderin ala kelgen La Tartine ókili Ásel Qabasheva.
“Tátti de dámdi” festıvál barshańyzdy kútedi!