Ónerimiz saǵan – Qazaqstan!
Qazaqtyń ulttyq aspaptaryn jetik meńgerip, memlekettik tilde erkin sóıleıtin ult ókilderi Almatyda ótken «Ónerimiz saǵan – Qazaqstan!» atty mýzyka festıvalinde óner kórsetti, dep habarlaıdy Almaty-akshamy.kz.
Mádenıet jáne sport mınıstrliginiń baspasóz qyzmetinen málim etkendeı, Jambyl atyndaǵy Qazaq memlekettik fılarmonıasynyń sahnasynda Oleg Nıkıtın dombyrada Qurmanǵazynyń «Adaı» kúıin, Babek Iyldyrym qobyzda «Qarakemer» kúıin oryndady. Denıs Iakovlev halyq áni «Eki jırendi», opera ánshisi Angelına Iýgaı «Qýanamyn» ánin, Roksana Qurbanova halyq áni «Arman-aıdy» kórermenderdiń erekshe qoshemetine bólene otyryp oryndady. Sondaı-aq basqa da artıser tamasha óner kórsetti.
Konserttik baǵdarlama Igor Blagodarnyıdyń oryndaýyndaǵy «Atameken» ánimen aıaqtaldy.
«İs-sharanyń negizgi maqsaty – Qazaqstanda turatyn etnıkalyq toptar arasynda qazaq halqynyń óneri men mádenıetin jan-jaqty nasıhattaý, oryndaýshylardyń kásibı sheberligin arttyrý», - delingen mınıstrlik habarlamasynda.