Almatyda jastar komýnaldyq qyzmetkerlerge ystyq shaı taratty
22-23 qańtar kúnderi Almatyda jaýǵan qalyń qardan keıin qala turǵyndary men jergilikti eriktiler bir-birine shynaıy qoldaý kórsetip, qamqorlyq tanytty. Qalanyń komýnaldyq qyzmeti kúsheıtilgen rejımde jumys istep, joldardy qardan tazalap, negizgi magıstraldarda keptelisterdiń aldyn alýǵa tyrysty. Qyzmetkerler táýlik boıy eńbek etip, qala turǵyndarynyń qaýipsizdigi men jaılylyǵyn qamtamasyz etti.
Qolaısyz aýa raıyna qaramastan, júzge jýyq erikti jalǵyzbasty zeınetkerlerdiń úıine baryp, aýlasvn qardan tazalaýǵa kómektesti.
«70-ten asqan kezde qar kúreý ońaı emes. Eriktilerdiń beı-jaı qalmaı, kómekke kelgenine qatty rıza boldym. Olar qol kómegimen qatar, júrek jylýyn jetkizdi, jyly sózderi aıazdy kúni janyńdy jadyratady. Ózimdi qamqor qalanyń turǵyny sezindim», – dedi zeınetker Elena Konstantınovna.
Jastar komýnaldyq qyzmetkerlerge ystyq sháı men tamaq taratyp qana qoımaı, jaıaý júrginshiler jolyn qardan tazalaýǵa da kómektesti.
Bul qamqorlyqty kórgen qala turǵyndary da qaıyrymdylyq sharalaryna atsalysty. Kópshiligi azyq-túlik, qar tazalaýǵa arnalǵan qural-jabdyqtar usynyp nemese kórshilerine kómektesip, bereke-birliktiń, qamqorlyqtyń úlgisin kórsetti.
Mundaı is-sharalar Almaty úshin tańsyq emes. Qalanyń eriktileri qys mezgilindegi tabıǵı apattarda ǵana emes, jyldyń kez kelgen ýaqytynda kómek kórsetetin túrli sharalardy turaqty túrde uıymdastyryp keledi. Olar áleýmettik jobalarǵa qatysyp, kópbalaly otbasylarǵa qoldaý kórsetedi, az qamtylǵan azamattarǵa kıim-keshek pen azyq-túlik jınaýdy uıymdastyrady.
«Biz kómek qajet ekenin kórip, beı-jaı qaraı almaımyz. Eriktilik – bir rettik aksıa emes. Bul bizdiń qalamyzdyń damýyna, turǵyndar arasyndaǵy jyly qarym-qatynasqa qosqan úlesimiz. Osylaısha, biz keıde baıqamaıtyn aýla sypyrýshylardyń, tazalyqshylardyń, komýnaldyq qyzmetkerlerdiń kúndelikti eńbegin baǵalaýdy úırenemiz. Almaty – bárimizdiń ortaq úıimiz, bir-birimizdi qoldap, súıikti qalamyzǵa birge qamqor bolaıyq!» – deıdi «Qamqor charity» qorynyń eriktisi Zere Maqsuthan.
Almatydaǵy qalyń qar qala úshin synaq bolǵanymen, adamdarǵa ózderin kórsetýdiń tamasha múmkindigine aınaldy. Osyndaı sátterde birlik pen bir-birine kómek kórsetý erekshe mańyzǵa ıe. Almaty eriktileri birneshe jyl boıy kúndelikti ómirde qalanyń naǵyz batyrlary atanyp, jaıly shaharǵa aınaldyryp keledi.