Tis aýrýlary jıi kezdesedi.
Jas balalarda keń taralǵan densaýlyq máselesine nefrologıalyq jáne stomatologıalyq aýrýlar jatady. Olardyń sebepteri men aldyn alý týraly Almaty óńirlik komýnıkasıalar qyzmetiniń brıfıńinde ál-Farabı atyndaǵy Qazaq ulttyq ýnıversıtetiniń medısına jáne densaýlyq saqtaý fakúlteti Joǵary medısına mektebiniń klınıkalyq mamandyqtar kafedrasynyń profesory Klara Shalabaeva jáne qalanyń shtattan tys bas balalar nefrology, №2 qalalyq balalar klınıkalyq aýrýhanasynyń nefrologıa bóliminiń meńgerýshisi Sáýle Alpysbaeva aıtyp berdi, dep habarlaıdy Almaty-akshamy.kz.
Klara Shalabaevanyń aıtýynsha, balalarda tis aýrýlary jıi kezdesedi.
«Dúnıejúzilik densaýlyq saqtaý uıymynyń krıterııleri boıynsha, bizdiń respýblıkada ártúrli jas toptaryndaǵy balalarda karıestiń taralýy ortasha eseppen 70-85 paıyzdy quraıdy, al qarqyndylyǵy boıynsha bizdiń balalarda karıestiń dekompensasıalanǵan túri jıi kezdesedi», - dedi Klara Shalabaeva.
Balalardyń stomatologıalyq densaýlyǵynyń bundaı jaǵdaıynyń sebebi – júktiliktiń patologıalyq aǵymy, áıeldiń densaýlyǵy, júktilik kezindegi teńgerimsiz tamaqtaný, ómirdiń birinshi jylyndaǵy balanyń aýrýy, kishi jáne mektep jasyndaǵy dıetadaǵy kómirsýlardyń artyq bolýy, aýyz qýysy gıgıenasynyń saqtalmaýy.
Sondaı-aq spıker tis aýrýlarynyń alǵashqy profılaktıkasy baǵdarlamasynyń joqtyǵy, mektep jasyndaǵy balalarǵa josparly túrde aýyz qýysyn saýyqtyrý, jalpy bilim beretin mektepterdegi stasıonarlyq stomatologıalyq kabınetterdiń jabylýy sıaqty mańyzdy áleýmettik faktorlar tis densaýlyǵynyń nasharlaýyna ákelip soqtyratynyn atap ótti. Respýblıkadaǵy stomatologıalyq mekemelerdiń 80%-dan astamynyń jeke menshikke ótýi stomatologıalyq kómekti balalar men jasóspirimderge qoljetimsiz etti. Stomatologıalyq qyzmetterdiń (plombalardyń) joǵary baǵasy ata-anasynyń materıaldyq jaǵdaıy tómen aýyldy jerlerde turatyn kópbalaly otbasy balalarynyń aýyz qýysyn jaqsartý múmkindiginen aıyrdy.
«Aýyz qýysynyń jaǵdaıy jalpy densaýlyqtyń kórsetkishi bolyp tabylady. Al tis aýrýyn azaıtpaı, deni saý bala ósirý múmkin emes», - dedi KlaraSHalabaeva.
№2 qalalyq klınıkalyq balalar aýrýhanasynyń nefrologıa bólimshesiniń meńgerýshisi Sáýle Alpysbaeva búginde balalar arasynda nefrologıalyq aýrýlardyń jıi kezdesetinin atap ótti. Onyń aıtýynsha, qyzdar men uldardaǵy aýrýdyń 80-85%-y – zár shyǵarý joldarynyń ınfeksıasy.
Spıker barlyq ata-analarǵa balalarda sebepsiz temperatýra, dızýrıa paıda bolǵan kezde aýyrsynýmen, isinýmen jıi zár shyǵarý nemese bala az zár shyǵara bastaǵan jaǵdaıda mindetti túrde jalpy zár analızin ótkizip, ýchaskelik dárigerge nemese nefrologqa júginýdi usyndy.
«Bul aýrýlardyń kóbin ózdiginen joıýǵa bolatynyn atap ótkim keledi. Aldyn alýdyń birneshe joly bar: balalarǵa sýdy kóp ishý, qyzdardy durys jýý, durys zár shyǵarý jáne ish qatýdyń aldyn alý», - deıdi Sáýle Alpysbaeva.