Almatyda ALMATY CIRCUS FESTIVAL II Halyqaralyq sırk óneri festıvali bastaldy.
Sırk manejinde Qytaı, Japonıa, Qazaqstan, Argentına, Brazılıa, Portýgalıa, Ispanıa, Italıa, Reseı, Vetnam, Belarýs, Ózbekstan, Ýkraına, Armenıa, Tájikstan, Iakýtıa, Qyrǵyzstan jáne Efıopıa sıaqty álemniń 18 elinen 80-nen astam úzdik ártister óner kórsetýde, dep habarlaıdy aqshamnews.kz
Sonymen qatar, festıvál bastalǵan kúni Qazaq memlekettik sırkiniń ujymy 54 jyldyǵyn atap ótýde. Ótken jyly, araǵa 35 jyl salyp, sırk artıseri Almaty qalasy ákimdiginiń qoldaýymen shetelge gastróldik saparlaryn qaıta bastady, Qytaı men Reseıdiń úzdik sırk mektepterinde biliktiligin arttyryp, oqýdan ótti, elden tys jerlerde bedeldi konkýrstar men festıváldarda marapattarǵa ıe boldy. Endi ekinshi jyl qatarynan aty ańyzǵa aınalǵan Qazaq memlekettik sırki Halyqaralyq festıvál ótkizýde.
«Bizdiń sırktiń jarty ǵasyrdan astam tarıhy bar jáne onyń óz festıvali bolýy kerek. Biz artıserimizdiń jetistikterin maqtan tutamyz, Almaty sırki halyqaralyq arenada belsendi jumys isteýde. Qazir ákimdik aıryqsha qoldaý kórsetip keledi, buǵan biz óte qýanyshtymyz. Biz úlken josparlardy júzege asyra otyryp, mádenı týrızmdi damytýǵa óz úlesimizdi qosyp jatyrmyz. Almaty turǵyndary men qonaqtary álemniń úzdik artıseri usynǵan qoıylymdardy óz kózderimen kórýi tıis», - dep atap ótti Qazaq memlekettik sırkiniń dırektory Maqsat Jaıyqov.
ALMATY CIRCUS FESTIVAL aıasynda ekvılıbrıser, akrobattar, áýe gımnasttary, arqanmen júrýshiler men jonglerler ózderiniń kásibıligi men sheberligin kórsetýde. Kórermenderdi tań qaldyryp, umytylmas shoý usyný úshin artıser qaýipti, qyzyqty ári kúrdeli trúkterdi oryndap jatyr. Qyzyqty faktilerdiń biri: Qytaıdan kelgen qatysýshy Van Manchen ózimen birge salmaǵy eki tonnaǵa jýyq aýqymdy rekvızıtterdi alyp kelgen. Aıta keteıik, festıválde Marına Starodýbova men Daıana Jetpisova «Jańbyrdaǵy ushý» nómirimen, sondaı-aq Nurym Qulenbaevtyń jetekshiligimen jongler-vırtýozdar Qazaqstan atynan óner kórsetýde.
Aıta keteıik, festıvál 28 shildege deıin jalǵasady, al jeńimpazdar men júldegerler Almatyda qalyp, tamyz aıynyń sońyna deıin megapolıs turǵyndary men qonaqtaryna festıvál baǵdarlamasymen óner kórsetedi. Qazaq memlekettik sırkiniń ári ALMATY CIRCUS FESTIVAL qoıylymdarynyń bas rejıseri Marına Redko artıser naǵyz shoý jasaıtynyn aıtty. Baǵdarlama Qazaqstan úshin sırek kezdesetin janrlarmen qamtylǵan.
«Ótken jyly birinshi festıválde tispen trúk jasaǵan nómirler boldy. Al osy jyly artıser «aıaqpen», ókshemen óte kúrdeli trúktar oryndaıdy. Qazir jazǵy demalys, osy ýaqytta balalar men eresekter álemniń úzdik sırk artıseri usynǵan qoıylymdardy tamashalaǵanyn qalaımyn», - dep atap ótti Marına Redko.
Jeńimpazdar men júldegerlerdi qazylar alqasynyń músheleri anyqtaıdy: Qytaı Ulttyq akrobatıkalyq trýppasynyń Prezıdenti Lı Chı (Qytaı), Sen-Pol-Le-Dakstaǵy Halyqaralyq sırk óneri festıvaliniń Prezıdenti Brýno Laloı (Fransıa), Italıadaǵy Halyqaralyq sırk óneri festıvaliniń Prezıdenti Fabıo Montıko (Italıa), Reseı memlekettik sırk kompanıasynyń bas dırektory Sergeı Belákov (Reseı), Úlken Máskeý memlekettik sırki bas dırektorynyń orynbasary Tatána Zapashnaıa (Reseı), Cirque d'Hiver Bouglione bas dırektory Odetta Býglıon (Fransıa), «Armonı Organızasyon» bas dırektory Ahmet Ekshı (Túrkıa), Astanalyq sırktiń bas dırektory Erik Joljaqsynov (Qazaqstan), MegaArt jáne JNT prodúserlik kompanıasynyń dırektory Mıhaıl Mýshýlov (Grýzıa), Tájik memlekettik sırkiniń bas dırektory Bahtıer Rahmatýllozoda (Tájikstan), ALMATY CIRCUS FESTIVAL bas qoıýshy-rejısseri Marına Redko (Qazaqstan), sondaı-aq qazylar alqasynyń tóraǵasy - Qazaq memlekettik sırkiniń dırektory Maqsat Jaıyqov (Qazaqstan).