Krıstına Vorobeva jetekshilik etetin Ózbekstannyń «Úshinshi tynys» darshylar komandasy II Halyqaralyq sırk óner festıvaliniń Bas júldesin jeńip aldy. «Úshinshi tynys» nómiri qazylar alqasynyń joǵary baǵasyna ıe bolyp, kórermen kózaıymyna aınaldy, dep habarlaıdy aqshamnews.kz
Ózbekstandyq sırk artıseri tek Bas júldeni ǵana emes, sonymen qatar «Armoni Organizasyon» bas dırektory Ahmet Ekshı (Túrkıa) men Qazaq memlekettik sırkiniń ardagerlerinen arnaıy syılyqtar aldy. Sonymen qatar, olar Sankt-Peterbýrgte ótetin «Bez granıs» Halyqaralyq sırk óner festıvaline shaqyrtý aldy.
«Óner adamy úshin festıvál – eń keremet sáttiń biri. Bul jańa tanystyqtyń bastaýy. Festıvál keremet uıymdastyrylǵan. Basshylyq barlyǵyn joǵary deńgeıde jasady. Búkil ujymnyń atynan Almaty sırki tabys tileımin jáne aldaǵy ýaqytta da seriktestigimiz arta túsedi dep oılaımyn», - dedi darshylardyń Sky Angels komandasynyń jetekshisi Krıstına Vorobeva.
Saıqymazaq Devıs Vasallo Almaty qalasy ákimdiginiń arnaıy syılyǵymen marapattaldy. Onyń kúlkili nómirleri kórermenderdiń qyzyǵýshylyǵyn týdyrdy. Bul rette ıtalándyq artısiń ózi ınteraktıvti qoıylymdaryna kórermenderdi barynsha tartýǵa tyrysty.
Altyn júlde:
- Marıa Terenteva (Reseı) – «Kúnge qaraý» nómiri.
- Svetlana Mıhnúk pen Alına Gabbasova (Reseı) – áýe saqınasy «Dýo Antresol».
- Vong Menchen (Qytaı) – ekvılıbrıs.
Kúmis júlde:
- Marına Starodýbova men Daıana Jetpisova (Qazaqstan) – «Jańbyrda ushý» nómiri. Sonymen qatar, olar Túrkıa men Grýzıadan kelgen qazylar alqasynyń arnaıy syılyǵyn jáne Italıada ótetin Halyqaralyq sırk óner festıvaline shaqyrtý aldy.
- «Qara búrkitter» (Efıopıa) – úıretilgen ıtterimen óner kórsetken.
- Evgenıı Komısarenko (Reseı) – úıretilgen ıtterimen óner kórsetken.
Qola júlde:
- Kımberlı Dzavatta (Italıa) – áýe gımnastshysy.
- Roman Kronjko men Angelına Prohorova (Ýkraına) – beldiktegi áýe dýeti.
- Djoan Godıno (Portýgalıa) – trapesıa gımnastshysy.
Astana qalasynyń «Astanalyq sırkinen» Nurym Kúlenbaev jetekshilik etetin «Virtuoso» jonglerler toby Qytaı ulttyq akrobatıkalyq trýppasynyń arnaıy júldesine ıe boldy.
Qazaq memlekettik sırkindegi festıvál baǵdarlamasy 25 tamyzǵa deıin jalǵasady. Bul is-shara sırk óneriniń túrli salalaryn kórsetip, kórermenderge erekshe áser qaldyrdy.