On birinshi synyp oqýshylary eresek ómir jolyn mektep aýlasyna aǵash otyrǵyzýdan bastady.
Aǵash otyrǵyzý túlekter arasynda dástúrge aınalǵan. Ár jyldyń mektep bitirýshileri bilim ordasyna degen alǵystaryn osylaı bildiredi. Bıyl bul úrdis Memleket basshysynyń «Taza Qazaqstan» ekologıalyq naýqany jáne «Almaty – bizdiń ortaq úıimiz» kalalyq kampanıa aıasynda jalǵasyn tapty.
Búgingi «Túlekterdiń aǵash otyrǵyzýy» respýblıkalyq eko-chellendji barysynda almatylyq túlekter 400-den astam jemis aǵashtary men 500-ge jýyq gúl kóshetterin otyrǵyzdy. Osy oraıda Bostandyq aýdanyndaǵy №105 gımnazıanyń túlekteri de aýqymdy naýqanǵa óz úlesterin qosty. Olar aksıa aıasynda oqý ǵımaratynyń aýlasyna 60-tan astam jemis jáne týıa aǵashtaryn otyrǵyzdy.
«Bul tek qoǵamdyq paıdaly jumys emes, bizdi oqytqan mektebimizdi, súıikti qalamyzdy kógaldandyrýǵa jáne jaqsartýǵa qosqan úlesimiz dep esepteımiz. Birneshe jyldan soń, mektebimizdi saǵynyp kelgende osy aǵashtardyń jaıqalyp ósip turǵanyn elestetsem, keýdemdi qýanysh sezimi kerneıdi», - deıdi №105 gımnazıanyń 11 synyp oqýshysy Alýa Tóleǵulova.
Jas túlekter osyndaı mańyzdy sharaǵa úlken jaýapkershilikpen qarady. Árqaısysy tyń daıyndyqpen kelgen. Aǵashtar shynaıy kóńilmen jáne asa qamqorlyqpen otyrǵyzyldy. Olar endi tamyryn tereńinen jaıyp, qalanyń odan ári jasyl jelekke aınalýyna sebep bolmaq .
Ekologıalyq naýqanǵa qoldaý bildirgen Almaty qalasy Bilim basqarmasynyń basshysy Lázzat Jylqybaeva jáne Basshy orynbasary Baqytjan Bıekova da №180, №105 mektep túlekterimen birge oqý ǵımaratynyń aýlasyna jemis aǵashtaryn otyrǵyzdy.
Aıta keteıik, bıyl Almatyda 15 myńnan astam oqýshy (13106 –memlekettik mektepter, 2528 – jeke) 11 synypty aıaqtap, altyn uıa mektebimen qoshtasady. «Almaty – bizdiń ortaq úıimiz» naýqanyna qatysyp, belsendilik tanytqan mektep bitirýshi túlekterge aldaǵy emtıhannan súrinbeı ótip, qalaǵan mamandyqtaryna túsýge tilektespiz.
Esterińizge sala keteıik, 8 sáýir men 8 mamyr aralyǵynda Almatyda «Almaty – bizdiń ortaq úıimiz» naýqany ótip jatyr. Árbir turǵyn qalanyń damýy men abattandyrylýyna óz úlesin qosa alady.
Barlyq aqparat almaty.kz saıtynda, Almaty ákimdiginiń áleýmettik jelilerinde ornalasqan. Sondaı-aq, veb-saıtqa arnaıy QR-kod arqyly qala boıynsha ornalastyrylǵan bannerlerde, plakattarda jáne afıshalarda kirýge bolady.
Naýqannyń belsendi qatysýshylaryna arnalǵan áleýmettik jelidegi heshtegter: #AlmatyNashObshııDom, #NasMnogoGorodOdın, #AlmatyBizdińOrtaqÚıimiz, #BizKóppizQalajalǵyz.