Almatynyń qala qurylysyn baqylaý basqarmasy Jamakaev kóshesinde salynyp jatqan turǵyn úı kesheniniń jobadan aýytqyǵany týraly habarlady.
Atap aıtqanda, «Benta» JSHS tapsyrys berýshisi Autograph TÚK qabattylyq normasyn buzǵan. Eskızdik jobaǵa sáıkes, nysan 3 qabat + tehnıkalyq qabattan turýy kerek. Alaıda qazir keshenniń ońtústik-batys jaǵynda 4 qabat, soltústik-shyǵys jaǵynda 3 qabat bar. Sonymen qatar, nysannyń eń bıik jeri shamamen 18 metr, al ruqsat etilgen bıiktik 12 metrden aspaýǵa tıis.
Esterińizge sala keteıik, 2022 jyly Almaty qalasynyń Máslıhatynyń sheshimimen jáne ákimdiktiń usynysy negizinde qurylys erejesine birqatar ózgeris engizilgen bolatyn. Sonyń ishinde ál-Farabı dańǵylynan joǵary ornalasqan ǵımarattar úshin 3 qabattan aspaıtyn, jertóle qabatty qosqanda 12 metrden bıik bolmaýy tıis degen shekteýler bar.
Qazirgi ýaqytta Autograph TÚK-niń qurylys-montajdaý jumystary toqtatylyp, bir aı ishinde buzýshylyqtardy túzetý jáne nysandy ruqsat berý qujattamasyna sáıkestendirý týraly nusqama berildi.
Aıta ketý kerek, talaptardy oryndamaý sot talqylaýlaryna, sonyń ishinde nysannyń jartylaı buzylýyna ákelýi múmkin.
Jalpy, Almaty ákimi Erbolat Dosaevtyń qurylysqa baqylaýdy kúsheıtý tapsyrmasy aıasynda byltyr jyl basynan beri 47 zańsyz nysan, sonyń ishinde «Mechta», KHAN, «Alma Garden» jáne basqa turǵyn úı keshenderi tolyq nemese jartylaı súrildi.