Almatyda sot naýryzdyń basynda áýejaı qyzmetkerin kepilge alǵan Mashrapbek Baratovqa qatysty úkim shyǵardy, - dep habarlaıdy Aqshamnews.kz tilshisi.
Túrksib aýdandyq soty Mashrapbek Baratovty 10 jyl 6 aıǵa bas bostandyǵynan aıyrdy.
Sonymen qatar, úkimge 2023 jylǵy is boıynsha taǵaıyndalǵan, biraq ótelmegen jazanyń merzimi qosylǵan. Ol is boıynsha sottalǵan adamǵa bostandyǵyn shekteý jazasy taǵaıyndalǵan. Nátıjesinde túpkilikti jaza 11 jylǵa bas bostandyǵynan aıyrý bolyp belgilendi.
Baratov jazasyn ortasha qaýipsizdik deńgeıindegi mekemede óteıdi. Sotta aıyptalýshynyń kinásin moıyndaýy jeńildetetin jaǵdaı retinde esepke alyndy.
Buǵan deıin memlekettik aıyptaýshy Baratovtyń qamaýda otyrǵan merzimin 7 naýryzdan bastap esepteýdi suraǵan.
Eske salaıyq, zeınetker Baratovqa qatysty sot 2025 jylǵy 7 sáýirde bastalǵan bolatyn. Sol otyrysta kólik áskerı prokýratýrasynyń prokýrory istegi aıǵaqtardy aıyptalýshy teriske shyǵarmaǵanyn aıtyp, sot otyrysyn qysqartylǵan tártippen ótkizýdi suraǵan edi.
Sot zalynda áýejaı qyzmetkeri men aıyptalýshy sóz sóılep, aıyptalýshy kontýzıa alǵanyn, sondaı-aq adamdy kepilge alýǵa ne ıtermelegenin aıtyp bergen. Proses barysynda aıyptalýshy buǵan deıin aıyptaýlarmen kelisken bolatyn. Biraq kenetten qandaı da bir talap qoıǵany týraly aıypqa kelispeıtinin aıtyp, is qosymsha tergeýge qaıtarylǵan edi.