Áýejaıdyń halyqaralyq ushýlarǵa arnalǵan tirkeý baǵanynda Ózbekstan Respýblıkasynyń 18 jastaǵy azamaty qaljyń túrinde óz júginde «atom bombasy» baryn aıtyp, qoǵamdyq tártip pen azamattardyń tynyshtyǵyn buzǵan, dep habarlaıdy aqshamnews.kz
Shetel azamaty QR usaq buzaqylyq boıynsha ákimshilik jaýapkershilikke tartylyp, oǵan 20 AEK (78 640 teńge) kóleminde aıyppul salyndy.
Kóliktegi polısıa departamentiniń málimetinshe, jyl basynan beri túrli ákimshilik quqyqbuzýshylyqtar jasaǵany úshin jolaýshylar poezdary men ushaqtardan akt boıynsha 900 destrýktıvti jolaýshyny, ıaǵnı, onyń 489-y jolaýshylar poıyzdarynan, al 411-i áýe kemelerinen túsirilgen.
Tıisti normalar men erejelerdi buzý kóp jaǵdaıda azamattardyń alkogóldik ishimdikterdi ishý nemese qoǵamdyq oryndarǵa masań kúıde kelýlermen baılanysty. Sondaı-aq, usaq buzaqylyq, vagondarda temeki shegý jáne basqa da buzýshylyqtar bolǵan.
- Mundaı derekter jıi kezdesedi. Jolaýshylar mundaı áreketteriniń sońy quqyqtyq jaýapkershilikke ákelip soǵatynyn bilmeı jatady. Kólik polısıasy kez kelgen kóliktegi jaǵdaıdy turaqsyzdandyrý nemese qorqytý áreketteri eleýli qaýip retinde qarastyrylatynyn jáne kináliler qoldanystaǵy zańnamaǵa sáıkes jaýapkershilikke tartylatynyn taǵy da eske salady, delingen habarlamada.