QR Kólik mınıstrligi men «Almaty halyqaralyq áýejaıy» AQ ınvestısıa máselelerin naqtylaý, iske asyrý kezeńderimen jáne áýe aılaǵyn odan ári damytýǵa baǵyttalǵan negizgi is-sharalar qarastyrylǵan yntymaqtastyq týraly Memorandýmǵa qol qoıdy.
Bul qujat aıasynda birinshi kezekte áýe aılaǵy qyzmetkerleriniń eńbek jaǵdaıyn edáýir jaqsartýǵa erekshe nazar aýdarylady, dep habarlaıdy aqshamnews.kz.
Investor birqatar korporatıvtik bastamalardy júzege asyrady:
• 2025 jyly áýejaı qyzmetkerleriniń jalaqysy orta eseppen 25%-ǵa ósedi;
• áýejaı aýmaǵynda áýejaı qyzmetkerleri men irgeles aýdandardyń turǵyndary úshin jańa medısınalyq ortalyq ashylady;
• ınvestor bıyl áýejaıda keminde 600 qosymsha jumys ornyn qurýdy qamtamasyz etedi;
• áýejaı aýmaǵynda ACI ortalyǵymen (halyqaralyq áýejaılar keńesi) akkredıttelgen arnaıy oqý ortalyǵy iske qosylady;
• qyzmetkerler úshin jeke asqana ashylady.
2025 jyldan 2029 jylǵa deıin TAV Holding áýejaıdy damytýǵa qosymsha 362 mıllıon dollar ınvestısıa quıady.
Osy qarajat esebinen ushý-qoný jolaǵy qaıta jańartylyp, júk tasymaldaýmen aınalysatyn kompanıalar úshin jańa perron salynady, ishki reıster termınaly jóndeledi, qolda bar júk qoımalary jańǵyrtylyp, sıfrlandyrylady, sondaı-aq áýejaı qonaq úıi salynyp, áýejaıdyń jumysyn jaqsartý úshin basqa da is-sharalar iske asyrylady.
Áýejaı ınfraqurylymynyń jańa ınvestısıalyq josparymen qosa, negizgi-jospardyń barlyq qosymsha málimetterin Almaty halyqaralyq áýejaıynyń aldaǵy baspasóz konferensıasynda (2025 jyldyń jazy) tolyǵyraq málimdeıdi.
Esterińizge sala keteıik, Almaty qalasy áýejaıynyń jalpy aýdany 53 500 sharshy metr bolatyn jańa termınaly ótken 2024 jyldyń maýsym aıynda paıdalanýǵa berildi