Áýe kompanıasy 31 qańtar kúni Vashıngton shtatynyń Everette zaýytynda sońǵy «Boıng-747»-ni klıentine tapsyrdy, dep habarlaıdy Almaty-akshamy.kz.
«Boıng-747»qalaı bolǵanda da álemdegi eń tanymal ushaqtardyń qatarynda. Ushaqtyń dáýreni 54 jyl boıy dúrildep turdy, ol áýe keńistiginde 1970 jyldan beri tanymal.
Bir kezderi tórt qozǵaltqyshty laıner tóńkeris jasap, tıimdilikti arttyryp, áýe qatynasyn qoljetimdi etti. Onyń aldyndaǵy Boeing-707 189 jolaýshy tasymaldasa, 747 model birden 550 orynǵa sertıfıkattaldy, keıinirek olardyń sany 660-qa deıin ósti. Olardy óndirý úshin kompanıa Vashıngton shtatynda jeke zaýyt salýǵa májbúr boldy.
Búgingi tańda álemde osy úlgidegi 44 jolaýshylar laıneri qoldanysta. Jalpy «Boıng-747» osy kezge deıin 3,5 mıllıard jolaýshyny tasymaldaǵan.
Ushaq óndirisiniń toqtaý sebebi, jarty ǵasyrda tehnıkalyq progres damyp ketti. Qazir álemde syıymdylyǵy jaǵynan tórt qozǵaltqyshty ushaqtardy qýyp jetken, al tıimdiligi jaǵynan olardan bas-aıaǵy asyp túsetin qos motorly ushaqtar kóp. Bir qyzyǵy, 747-niń negizgi básekelesi, eýropalyq tórt qozǵaltqyshty A380 laıneri nebári 16 jyl buryn jasalǵanyna qaramastan, ol da dál sol sebepti endi shyǵarylmaıdy.
Boeing qataryndaǵy jańa «flagman» 2020 jyly alǵashqy reısin jasaǵan eki qozǵaltqyshty keń fúzelájdy 777X laıneri bolady.
Degenmen, Boeing-ty jasap shyǵarýshylar qazirgi qoldanystaǵy ushaqtarynyń ózi uzaq ýaqyt ushatynyna jáne jekelegen ekzemplárlary osy úlginiń 100 jyldyq mereıtoıyna deıin jaraıtynyna senimdi.