Óńirlik komýnıkasıalar qyzmetiniń alańynda 2025 jyldyń alǵashqy alty aıyndaǵy Ekologıa departamentiniń jumys qorytyndysyna arnalǵan baspasóz konferensıasy bolyp ótti.
Departament basshysynyń orynbasary Dinmuhamed Lesbekov qala ekologıasyn jaqsartý baǵytynda júrgizilgen is-sharalardy, kásiporyndardaǵy baqylaý men ekologıalyq máselelerge qatysty jol kartasynyń qalaı júzege asyp jatqanyn baıandap berdi.
Spıkerdiń aıtýynsha, departamentke ekologıalyq ruqsatnamalar alý úshin 103 ótinish túsken, onyń 87-si óńdelgen. Birinshi kategorıadaǵy nysandar, onyń ishinde «AlES» aksıonerlik qoǵamy men iri ónerkásiptik kásiporyndar qorshaǵan ortany qorǵaýǵa 543 mıllıon teńgeden asa qarjy jumsaǵan. 1 JEO-da kómirqyshqyl gazy men azot oksıdterinen bólinetin zıandy zattyń kólemi azaıyp, basqa stansıadaǵy shań-gazdy tazartý qondyrǵylary jóndeýden ótip, sýdy shyǵyndaý men lastanýdy jaǵyn da azaıtý kózdelgen.
Osy kezeńde memlekettik ekologıalyq ınspektorlar 49 tekserý júrgizip, onyń 16-sy jospardan tys tekserý boldy. Sonyń arqasynda 28 ákimshilik quqyq buzýshylyq týraly hattama toltyrylyp, 23 aıyppul salynypty.
Sarapamalyq baqylaý bóliminiń zerthanasy Almaty qalasynyń aýasy men sý kózderindegi lastanýy artqanyn anyqtamady. Óndiristik shyǵaryndylar, aǵyndy sýlar, topyraq sapasy men avtokóliktiń tekserisi boıynsha turaqty monıtorıń júrgizilip jatyr. 2024 jylǵy osy ýaqytpen salystyrǵanda zań buzýshylyq sany, ásirese dızeldi kólikter boıynsha edáýir azaıǵan.
Almatynyń ekologıasyn ońaltýdy kózdeıtin jol kartasy TES-tiń zıandy áserin azaıtýdan bastap, jasyl jelekterdi nyǵaıtý men qaldyqtardy basqarýǵa deıingi jeti baǵytty qamtıdy. Qazir bular birtindep qolǵa alyna bastady. Mysaly, 2024–2028 jylǵa arnalǵan komýnaldyq qaldyqtardy basqarý baǵdarlamasy kelisilip jatyr.
Almaty qalasyndaǵy ekologıalyq jaǵdaı júıeli tásildi talap etedi. Tabıǵat paıdalanýshylarymen birlesip jumys istep, úzbeı zerthanalyq baqylaý jasap, zań buzýshylyqqa jaýapkershilikti kúsheıte tússe, ekologıany jaqsartýǵa sep bolatynyn aıtady Departament ókilderi.