Almaty álem nazarynda: qalada ınklúzıv bilim berýdiń WIC 2025 Dúnıejúzilik kongresi ótip jatyr

Búgin Almatyda 15-17 qazan aralyǵynda ótetin Inklúzıv bilim berý jónindegi birinshi Dúnıejúzilik kongres - World Inclusion Congress (WIC 2025) bastaldy. İs-sharany Qazaqstan Respýblıkasynyń Oqý-aǵartý mınıstrligi, Almaty qalasynyń ákimdigi, «HOPE» qory (Help Others Pursue Education, Qazaqstan) jáne International Forums of Inclusion Practitioners (IFIP, Ulybrıtanıa) birigip uıymdastyrdy.
 
Kongres aıasynda álemniń 40 elinen kelgen 1200-den astam qatysýshy, memlekettik organdardyń ókilderi, halyqaralyq jáne ǵylymı uıymdar, pedagogter men sarapshylar, sondaı-aq ınklúzıvti bilim berý salasyndaǵy kóshbasshylar bas qosty.
 
Qatysýshylar arasynda Azıa, Afrıka, Eýropa, Soltústik Amerıka jáne Avstralıa elderiniń delegattary bar. 100-den astam sheteldik jáne otandyq sarapshy plenarlyq jáne paneldik sesıalarda baıandama jasaıdy.
 
Kongrestiń qurmetti qonaqtary qatarynda IFIP uıymynyń negizin qalaýshy, ınklúzıvti bilim berý salasyndaǵy sarapshy Danıel Sobel, Nottıngem ýnıversıtetiniń prorektory, ınklúzıvti bilim boıynsha jetekshi ǵalym Ýmesh Sharma, sondaı-aq áıgili Fuji Kindergarten balabaqshasynyń avtory, japon sáýletshisi Takakýra Tezýka bar.
 
Kongrestiń negizgi taqyryby bilim berýdegi ınovasıa, sıfrlandyrý jáne jasandy ıntellekt tehnologıasyn engizý. Ásirese, erekshe bilim berý qajettiligi bar balalardy qoldaýǵa arnalǵan tehnologıalyq sheshimderge, oqytýdyń sapasyn arttyrýǵa, halyqaralyq tájirıbe almasýǵa jáne elder arasyndaǵy seriktestikti damytýǵa basa mán berildi. 
 
Kongres aıasynda Innovation Expo atty ınovasıalar kórmesi ashyldy. Kórmede sıfrlyq tehnologıa, bilim berý jáne qoljetimdi ortaǵa arnalǵan sheshimder usynylǵan. İs-sharaǵa Qazaqstan, Ulybrıtanıa, Qytaı, AQSH, Polsha jáne Ońtústik-SHyǵys Azıa elderinen 17 kompanıa qatysyp jatyr. Kórme úsh kún boıy Grand Hall qonaqúıinde jáne ashyq pavılondarda ótedi.
 
Kongrestiń alǵashqy kúni «Inklúzıvti bilim berýdegi jahandyq trendter: syn-tegeýrinder men sheshimder» taqyrybynda dóńgelek ústel jáne balalardyń psıhıkalyq ál-aýqaty, erekshe bilim berý qajettiligin baǵalaý syndy 15 taqyryp boıynsha paneldik sesıalar uıymdastyryldy.
 
16-17 qazan kúnderi de kongres jalǵasady. Osy kúnderi ınklúzıvti bilim berý salasyndaǵy ǵylymı uıymdar men seriktester arasynda yntymaqtastyq týraly memorandýmdarǵa qol qoıý josparlanyp otyr.
 
Almaty deklarasıasynyń jobasyn talqylaýǵa basa nazar aýdarylady. Onyń qabyldanýy ınklúzıa salasynda sıfrlyq tehnologıa men jasandy ıntellektti qoldanýda biryńǵaı halyqaralyq tásilderdi qalyptastyrý men yntymaqtastyqty nyǵaıtýdyń mańyzdy qadamy bolmaq.
 
Kongres 17 qazanda saltanatty túrde jabylady. WIC 2025 ınklúzıa mádenıetin damytýǵa, bilimge teń qoljetimdilikti ilgeriletýge, jańa tehnologıa men úzdik halyqaralyq tájirıbe engizýge jáne halyqaralyq seriktestikti nyǵaıtýǵa serpin beredi.