Jumys sapary barysynda Almaty ákiminiń orynbasary Asqar Amrın qala skverleri men kóshelerin abattandyrý jumystarynyń sapasyn tekserdi, dep habarlaıdy Almaty-akshamy.kz.
Birinshi nysan - Oqýshylar saraıynyń mańyndaǵy skver boldy. 2021 jyly Oqýshylar saraıy aldyndaǵy jalpy aýdany 5 ga quraıtyn aýmaqty abattandyrý jobasy bekitildi. Qazirgi tańda jumystardyń 40% aıaqtalyp, jańa sýarý júıesiniń transheıasy qazyldy. Jaryqtandyrý júıesin, balalar alańyn, oryndyqtar men qoqys jáshikterin ornatý, sýarý júıesin qalpyna keltirý, 147 japyraqty jáne qylqanjapyraqty aǵash otyrǵyzyp, kógaldandyrý jumystaryn júrgizý josparlanǵan. Tekserý barysynda Asqar Amrın zaqymdanǵan tamyr júıesine mán berip, jumys tehnologıasyn jasyl jelekke zıan tıgizbeıtindeı etip qatań saqtaýǵa baqylaýdy kúsheıtý týraly tapsyrma berdi. Ákim orynbasary skverdiń tarıhı kelbetin saqtaý qajettigine basa nazar aýdardy. Jumystyń qarqynyn kúsheıtý úshin qosymsha jumys kúshin tartyp, ornatý jumystaryn qyrkúıekte aıaqtaýdy tapsyrdy.
Kelesi nysan - Memlekettik murajaı aldyndaǵy skver boldy. Qazirgi kezde bul aýmaqta bólshekteý jumystary aıaqtalǵan, jaryqtandyrý júıesi ornatylǵan, sýburqaq túbi betondalyp, sýarý júıesiniń qubyrlary salynǵan. Budan ári kishi arhıtektýralyq pishinderdi ornatyp, kógaldandyrý jumystaryn júrgizý josparlanǵan.
Almaty ákiminiń orynbasary jumys sapary barysynda Baıseıitova kóshesiniń Jambyl kóshesinen Sátbaev kóshesine deıingi bóligin abattandyrý jumystarymen tanysty. Atalǵan aýmaqta jaryq júıesi ornatylyp, kespetastar tóselgen, sýarý júıesiniń qubyrlary tartylǵan. Jumystardy qazan aıynyń sońynda aıaqtaý josparlanǵan.
Asqar Amrın Álıa men Mánshúk atyndaǵy skverdi abattandyrý jobasymen tanysty. Ákim orynbasary apatty aǵashtardy keser aldynda mamandardy shaqyryp, jasyl jelekti tolyq tekseristen ótkizýdi tapsyrdy.
Qala ákiminiń orynbasary abattandyrý jumystary júrgizilip jatqan oryndardyń biri Qazaq-Brıtan tehnıkalyq ýnıversıteti janyndaǵy Soltústik skverine de bardy. Ol merdiger uıym ókilderine jumys sapasyna qatysty birqatar eskertý jasap, qosymsha mamandar shaqyryp, jumys qarqynyn kúsheıtýdi tapsyrdy.
Nátıjesinde Asqar Amrın Ekologıa jáne qorshaǵan orta basqarmasyna eskertý jasap, qysqa merzimde barlyq olqylyqtardy retteýdi, ornatý jumystaryn qyrkúıekte aıaqtap, barlyq skverlerdi 1 qarashaǵa deıin qoldanysqa berýdi tapsyrdy.