Almaty ákiminiń orynbasary Almasqan Smatlaev kún saıyn tańǵy saǵat 5:00-te jumys saparyn nysandardy aralaýdan bastaıdy. Mundaı keste jobalardyń oryndalýyn turaqty baqylaýda ustap, týyndaǵan máseleler boıynsha jedel sheshim qabyldaýǵa múmkindik beredi, dep habarlaıdy Aqshamnews.kz tilshisi.
Eń áýeli ol qala aýmaǵynda uzyndyǵy 23 shaqyrym bolatyn D.Qonaev atyndaǵy Úlken Almaty kanalynyń kúrdeli jóndeýimen tanysty. Qurylys 2026 jyly qazan aıynda aıaqtalmaq. Almasqan Smatlaev bul jobanyń qala úshin strategıalyq mańyzy zor ekenin atady, sebebi kanal sý resýrstaryn saqtaýdy jáne turǵyndardyń qaýipsizdigin qamtamasyz etedi.
Odan keıin uzyndyǵy 2 shaqyrym bolatyn Boraldaı ózeniniń arnasyn qaıta jańǵyrtý jáne irgeles aýmaqty abattandyrý jumystaryn kórdi. Bul is 2026 jyly tamyzda bitedi dep josparlanǵan. Ákimniń orynbasary qurylys qarqynyn jedeldetip, jumys sapasyn qadaǵalaý qajettigin aıtty. Bul shara turǵyn úılerdi sý basýdan qorǵaýǵa baǵyttalǵan.
Sapar sońynda Smatlaev «Qurylysshy» jáne «Ójet» shaǵynaýdandarynda salynyp jatqan bes kárizdik-sorǵy stansıasyn kórip shyqty. Bul nysandar 10 myńnan astam turǵyndy qamtýǵa eseptelgen. Jospar boıynsha joba 2025 jyly jeltoqsanda aıaqtalýǵa tıis. Búginde bes stansıanyń tórteýi joǵary daıyndyq satysynda tur. Ákimniń orynbasary merdigerge sapany baqylaýdy kúsheıtip, qurylysty belgilengen merzimde aıaqtaýdy tapsyrdy.