Jetisý aýdanynda Almatydaǵy eń alǵashqy ınklúzıvti balalar oıyn alańy paıdalanýǵa berildi. Ol «Baqytty otbasy» otbasyn qoldaý ortalyǵynyń janynda, Seıfýllın dańǵyly men Jansúgirov kóshesiniń qıylysynda ornalasqan.
Aýdan ákimdiginiń málimetinshe, alańnyń basty ereksheligi – onyń barlyq balaǵa, sonyń ishinde erekshe qajettilikteri bar ul-qyzdarǵa da qoljetimdiliginde. Munda balalardyń erkin oınap, dene shynyqtyryp ári qoǵamǵa beıimdelýine jaǵdaı jasalǵan. Bul bastama shyn máninde teń ári jaıly qalalyq ortany qurý jolyndaǵy mańyzdy qadam bolyp otyr.
Jetisý aýdany ákiminiń orynbasary Danıar Álkebaıulynyń aıtýynsha, jańa alań «Halyq qatysatyn búdjet» baǵdarlamasy aıasynda boı kótergen.
"Buryn bul jerlerde eski úıler bolǵan. Aınalma jol salynǵannan keıin aınalasynda bos jerlerdi sátti paıdalanyp, osyndaı halyqqa paıdaly aımaqtar jasadyq. Bul oıyn alańynyń basty ereksheligi – onyń barlyq balaǵa qoljetimdi bolýy. Munda múmkindigi shekteýli balalar da erkin oınap, sportpen aınalysyp, qatarlastary sıaqty qoǵamǵa beıimdele alady. Inklúzıvti orta árbir balanyń damýyna jaǵdaı jasaıdy", – dedi ol.
Alańnyń basty nyshany – urpaqtar sabaqtastyǵyn, otbasy qundylyǵyn jáne birlikti beıneleıtin «Baqytty otbasy» músini.
Ashylý saltanatyna «Baqytty otbasy» ortalyǵynyń ókilderimen birge Almaty qalalyq máslıhatynyń depýtattary men aýdan ákimdiginiń qyzmetkerleri qatysty.
Ashylý saltanatyna kelgen balalar ata-analarymen kelip, átkenshek teýip, túrli oıyn qurylǵylarynda oınady. Anımasıalyq keıipkerler búldirshindermen birge oıyn uıymdastyryp, qonaqtar balalarǵa táttiler, balmuzdaqtar taratty.
Kópbalaly ana Áıgerim Kývatova «Balalarym shyn qýanyp oınap júr. Mundaı alańdar kóp bolsa, ár otbasy úshin úlken qoldaý bolar edi», – dep qýanyshymen bólisti. Jansúgirov kóshesiniń turǵyny Aızada Bagırova da rızashylyǵyn bildirip:
«Budan bylaı bul jerge kúnde kelemiz. Balalaryma unap jatyr. Munda oıyn túrleri kóp eken. Qaýipsiz ári qyzyqty oryn bolypty», – dedi.
Jańa jobanyń aıasynda zamanaýı ınklúzıvti sport jáne oıyn keshenderi ornatylyp, qaýipsizdik úshin 200-den astam jaryq shamy men 12 beınebaqylaý kamerasy qoıyldy. Sondaı-aq 22 oryndyq pen shaǵyn sáýlettik nysandar ornalastyrylǵan. Terıtorıa kógaldandyrylyp, jasyl jelekti kútip-baptaý úshin skvajınadan qýat alatyn avtomatty sýarý júıesi iske qosyldy.
Jańa ınklúzıvti alań – Almatynyń árbir turǵynyna, ásirese balalarǵa jasalǵan qamqorlyqtyń kórinisi desek bolar. Bul bastama qaladaǵy qoljetimdi ári teń múmkindikter ortasyn keńeıtip, turǵyndardyń kúndelikti ómirin jandandyra túsetini anyq.