Almaty ákimi Darhan Satybaldynyń tóraǵalyǵymen qalada «Taza Qazaqstan» respýblıkalyq ekologıalyq aksıasyn júzege asyrý jáne Almatyny kógaldandyrý men abattandyrýdyń kúzgi naýqanǵa daıyndyǵy boıynsha jıyn ótti. Kezdesýde aýdan ákimdikteri men salalyq qyzmet ókilderiniń esepbi tyńdalyp, jazǵy jumys qorytyndylandy jáne kúzgi egis maýsymy boıynsha is-sharalar bekitildi, dep habarlaıdy Aqshamnews.kz.
Kúzgi kezeńde Almatyda bıiktigi 4–5 metr bolatyn 13 myń iri aǵash jáne shamamen 100 myń buta otyrǵyzý josparlanǵan. Jumystar qalanyń 37 aýmaǵynda – magıstraldy kósheler boıynda, sondaı-aq saıabaq pen skverlerde júrgiziledi. Kóktemde bıiktigi 6 metrden asatyn 2 myń iri aǵash egilgen bolatyn. Olardyń qatarynda jóke, shaǵan, qaraǵash, qaraǵaı, kúmis úıeńki jáne jasyl shyrsha bar.
Negizgi aýmaqtardyń ishinde – Rysqulov dańǵyly (500 aǵash, bir bóligi kóshirý arqyly saqtalady), Jańa Saın kóshesi (500 aǵash), sondaı-aq «Almaty Arena» mańy (60 aǵash). Almaty ákimi Darhan Satybaldy kógaldandyrý sapaly ári qalanyń klımattyq jáne topyraqtyq erekshelikterin eskere otyryp júrgizilýge tıis ekenin atap ótti.
«Bizdiń mindetimiz – esep úshin aǵash otyrǵyzý emes. Mańyzdysy – olardyń jersinip, ósip, qalanyń ekologıasyna uzaq jyldar paıda ákelýi», – dedi ol.
Aǵash otyrǵyzýmen qatar Almatyda sanıtarlyq tazalaý jáne abattandyrý jumystary belsendi júrip jatyr. Tek Medeý aýdanynda sońǵy aptalarda 60 jerde 31 jergilikti senbilik ótkip, oǵan 6 myńnan astam turǵyn, erikti jáne bıznes ókilderi qatysty. 400-den astam tehnıka jumyldyrylyp, 6 myń tekshe metrden astam qoqys shyǵaryldy. Qalada aýlalardy keshendi tazalaý jumystary júrip jatyr: 158 aýla qamtyldy, al 10 qazanǵa deıin taǵy 256 aýlada jumystar aıaqtalmaq.
Komýnaldyq qyzmetterdiń jumysyna da erekshe nazar aýdarylýda. Naýryzbaı aýdanynda aryq júıesin tazalaý boıynsha aýqymdy jumys júrip jatyr: ol 92 kósheni, jalpy uzyndyǵy 100 km-den astam aýmaqty qamtıdy. Jumysshylar men arnaıy tehnıka jumyldyrylǵan. Eki apatty ótkel jóndelip, taǵy ekeýiniń qurylysy bastaldy, olar qazan aıynyń ortasyna deıin aıaqtalady.
Sonymen qatar qalanyń komýnaldyq qyzmetteri kúsheıtilgen rejımde – táýlik boıy úsh aýysymda jumys istep, kóshelerdi ýaqytyly tazalaýdy jáne árbir aýdanda tártipti qamtamasyz etýde.
Sonymen birge aýlalardy abattandyrý jalǵasýda: ótken jyly 18 aýlada qorshaýlar ornatylǵan bolsa, bıyl taǵy 8 km-den astam qorshaý qoıý josparlanǵan. Qaladaǵy qoqys jáshiginiń maǵyna beınabaqylaý kameralary ornatylýda: bıyldyń ózinde 220 kamera qoıyldy, taǵy 122-sine ótinim berilgen.