Almaty qalasynyń ákimi Darhan Satybaldy jumys sapary barysynda «Lamiya» turǵyn úı kesheni men jáne «Kóktem» shaǵynaýdanynyń turǵyndarymen kezdesti, dep habarlaıdy aqshamnews.kz
Qala turǵyndaryn alańdatqan ınjenerlik jelilerdiń jaǵdaıy, aýmaqty abattandyrý jáne jasyl jelekterdi saqtaý jaıy talqylandy.
«Lamiya» turǵyn úı kesheni turǵyndarymen kezdesý kezinde elektr qýatymen úzdiksiz qamtý jáne ınjenerlik jelilerdi qalanyń ıeligine berý máselesi qozǵaldy. Júzdesý barysynda Darhan Satybaldy energetıka men sýmen jabdyqtaý basqarmalaryna, qala qurylysy baqylaýy qyzmetine MIB ókilderi men qurylys kompanıasymen birlesip qosymsha transformatorlyq qosalqy stansıa men rezervtik kabel salý máselesin pysyqtap, keıin ony qalanyń menshigine ótkizýdi tapsyrdy.
Sonymen qatar, komýnaldyq ınfraqurylym jáne turǵyn úı ınspeksıasy basqarmasyna burynǵy basqarýshy kompanıanyń qyzmetin quzyreti sheginde tekserý mindetteldi.
«Kóktem» shaǵynaýdanynyń turǵyndary bos jatqan jerler qurylysqa berilip kete me dep alańdap otyr. Ákimniń tapsyrmasymen jerdi óz betimen ıemdený faktileri boıynsha qosymsha tekserý júrgiziledi.
Darhan Satybaldynyń aıtýynsha, jasyl aımaqtardy saqtaý men qoǵamdyq keńistikter qurý – qala saıasatynyń basty basymdyqtarynyń biri.
«Barlyq sheshim bas josparǵa saı, ashyq túrde jáne turǵyndardyń pikirin eskere otyryp qabyldanýy qajet. Eger belgili bir aýmaq jasyl aımaqqa jatsa, onda ol jerde eshqandaı qurylys salynbaıdy, aǵash ta kesilmeıdi. Biz aǵashtardyń otalýyna jol bermeımiz. Aýmaqty damytý men tabıǵatty saqtaýdyń arasynan tepe-teńdik tabý – bizdiń basty maqsatymyz», – dedi qala ákimi.
Turǵyndardyń ótinishi baqylaýǵa alynyp, belgilengen tártippen qaralady. Almaty ákimi almatylyqtarmen turaqty kezdesip, olardyń usynys-pikirin jeke tyńdaıdy. Árbir másele erekshe nazarda jáne tıisti basqarmalarmen birlesip sheshimin tabady.
Buǵan deıin «Altyn Sıtı» turǵyn úı kesheni turǵyndarynyń ótinishimen qala ákimi Darhan Satybaldy turaqty jylýmen qamtýdy qamtamasyz etý jóninde keshendi sharalar qabyldaýdy tapsyrǵan bolatyn. Turǵyndar qys mezgilinde jylýdyń jıi óshetinin aıtyp, úıdiń ysymaıtynyna shaǵymdanǵan. Tekserý nátıjesinde avtonomdy qazandyqtyń jumysy tolyqtaı rettelip, jańa jabdyqtar ornatyldy. Qazandyqtar men sorǵylar aýystyrylyp, jańa qazandyqtyń qurylysy bastaldy. Turǵyndar sanynyń ósýin eskerilip salynatyn nysan aldaǵy jyldary búkil aýmaqty jylýmen qamtamasyz etedi.