Almaty qalasynyń ákimi Erbolat Dosaevtyń tóraǵalyǵymen sybaılas jemqorlyqqa qarsy is-qımyl máseleleri jónindegi qalalyq komısıanyń keńeıtilgen otyrysy ótti. Otyrysqa aýdan ákimderi, memlekettik jáne quqyq qorǵaý organdarynyń, kvazımemlekettik sektordyń basshylary men qoǵam ókilderi qatysty, dep habarlaıdy Almaty-akshamy.kz.
Erbolat Dosaev óziniń sózinde sybaılas jemqorlyqty joıý úshin paraqorlyq jaǵdaılardy barynsha azaıtýǵa múmkindik beretin júıeli sharalar qabyldaý qajettigin atap ótti.
«Árbir basshy sybaılas jemqorlyqtyń aldyn alýǵa baǵyttalǵan naqty sharalardy qabyldaýy tıis. Memlekettik organdardyń árbir basshysyn KPI-de sybaılas jemqorlyqqa qarsy qabyldanyp jatqan sharalary, al onyń ishinde qaramaǵyndaǵy qyzmetkerlerdiń sybaılas jemqorlyq faktileri boıynsha baǵalaýdy qarastyrý qajet», - dedi qala ákimi Erbolat Dosaev.
Qazaqstan Respýblıkasy Sybaılas jemqorlyqqa qarsy is-qımyl Agenttiginiń Almaty qalasy boıynsha departamentiniń basshysy Asqat Orazhannyń aıtýynsha, búginde sybaılas jemqorlyqtyń aldyn alý máselesinde oń ilgerileý bar.
«Memlekettik qyzmetshilerdiń ózderine usynǵan para týraly habarlaıtyn trend baıqalady, keıbir jaǵdaılarda olardyń somasy 70 mln teńgeden asady. Jastar arasynda da dúnıetanym ózgerýde, áleýmettik jelilerde oqýshylar ǵımaratty zańsyz jalǵa berýdi josparlaǵan mektep dırektorynyń is-áreketine júgindi», - dedi Asqat Orazhan.
Aǵymdaǵy jyldyń alty aıynda Almatyda sybaılas jemqorlyq faktileri týraly habarlaǵany úshin 640 myń teńgeden astam somaǵa 3 adam yntalandyryldy.
Kezdesý barysynda sybaılas jemqorlyq táýekelderine ishki taldaý júrgizý, komplaens-qyzmetti engizý jáne sybaılas jemqorlyqqa qarsy mádenıetti qalyptastyrý tetikteri men qorytyndylary qaraldy.
Otyrys qorytyndysy boıynsha qala ákimi Erbolat Dosaev memlekettik organdardyń basshylaryna sybaılas jemqorlyq táýekelderin anyqtaý, joıý jáne sybaılas jemqorlyqqa qarsy mádenıetti nyǵaıtý boıynsha turaqty jumys júrgizýdi tapsyrdy.