Qala basshysy Qazaqstan Prezıdenti Qasym-Jomart Toqaevtyń atynan Almatynyń 31 turǵynyna memlekettik nagradalardy tapsyrdy, dep habarlaıdy Almaty-akshamy.kz
Olardyń qatarynda eldiń áleýmettik-ekonomıkalyq jáne mádenı damýyna eleýli úles qosqan, qalanyń qoǵamdyq ómirine belsendi qatysqan, qańtardaǵy oqıǵalar kezinde azamattardy qutqarý jáne qorǵaý barysynda batyldyq tanytqan azamattar bar.
«Parasat» ordenimen QR Ulttyq Ǵylym akademıasynyń akademıgi Kárimbek Qurmanalıev, «Qazaqstan Respýblıkasynyń Qyzyl Jarty Aı qoǵamy» QB prezıdenti Erkebek Arǵymbaev, «Qurmet» ordenimen Qazaqstan Jazýshylar Odaǵy tóraǵasynyń orynbasary Aqberen Elgezek, «Shapaǵat» medalimen «Lıder.kz» Eriktiler qozǵalysy» QB basshysy Dılmıra Blas, turǵyn úıdegi órtti sóndirýshi, aýla qyzmetkeri Arlan Mýtıshev jáne taǵy basqalary marapattaldy.
Óziniń sózinde qala ákimi Erbolat Dosaev Memleket basshysynyń sheshimi boıynsha memlekettik nagradalarmen marapattaý rásimi alǵash ret kóktemgi jańarý kúni qarsańynda ótip otyrǵanyn atap ótti.
"Dál osy Naýryz merekesi qarsańynda Prezıdent Qasym-Jomart Kemeluly Toqaev «Jańa Qazaqstandy» qurý jolyndaǵy saıası jańarý men jańǵyrtýdyń strategıalyq paıymyn baıandaıtyn Joldaýyn jarıa etti. Memleket basshysy eldiń turaqty ilgerileýi men aýqymdy áleýmettik-ekonomıkalyq ózgerister saıası jańǵyrýsyz múmkin emes ekenin atap ótti", – dedi Almaty ákimi.
Kezdesý sońynda qala basshysy saltanatty rásimge qatysýshylardy laıyqty memlekettik nagradalarmen quttyqtap, jumysta tabys jáne jańa bıikterge jetýlerine tilektestik bildirdi.