Almaty ákimi Darhan Satybaldy jumys sapary barysynda Almatynyń Bostandyq aýdanynda ornalasqan №37 qalalyq emhanaǵa baryp, nysannyń jumysyn bastaýǵa daıyndyǵymen tanysty, - dep habarlaıdy Aqshamnews.kz.
Emhana Gagarın dańǵylynda ornalasqan jáne bir aýysymda 500 adamdy qabyldaýǵa eseptelgen. Medısınalyq mekeme medısınalyq-sanıtarıalyq alǵashqy kómek kórsetýdiń biryńǵaı standarttaryna sáıkes keledi, zamanaýı medısınalyq jabdyqtarmen tolyq qamtamasyz etilgen jáne qozǵalysy shekteýli azamattar úshin tolyq beıimdelgen.
Ǵımaratta sáýlelik dıagnostıka bólimi, hırýrgıa jáne travmatologıa kabınetteri, klınıkalyq-dıagnostıkalyq zerthana, endoskopıa bólimi, 20 orynǵa arnalǵan kúndizgi stasıonar, áıelder konsýltasıasy, sondaı-aq profılaktıkalyq jáne konsýltatıvtik-dıagnostıkalyq qyzmetter ornalasqan.
Atalǵan emhananyń Qazaqstanda alǵashqy ret biryńǵaı MSAK standarty boıynsha salynǵan nysan ekeni atap ótildi. Nysan memlekettik búdjet qarajaty esebinen boı kótergen. Ony paıdalanýǵa berý qala halqy sanynyń artýyn eskere otyryp, medısınalyq kómektiń qoljetimdiligin arttyrýǵa múmkindik beredi.
Nysandy aralaý qorytyndysy boıynsha Darhan Satybaldy densaýlyq saqtaý salasynda zamanaýı ári jaıly jaǵdaı jasaý Qazaqstan Respýblıkasy Prezıdenti Qasym-Jomart Toqaevtyń tapsyrmalary aıasynda júzege asyrylyp jatqanyn atap ótti. Qala ákimi ınfraqurylymdy damytýmen qatar medısınalyq uıymdardy bilikti mamandarmen tolyq qamtamasyz etý jáne jumysty medısınalyq kómektiń sapasy men qoljetimdiligine qoıylatyn belgilengen standarttarǵa saı uıymdastyrýdyń mańyzdylyǵyn jetkizdi.
Qazirgi ýaqytta Almatyda medısınalyq-sanıtarlyq alǵashqy kómekti 78 medısınalyq uıym kórsetedi. Onyń 41-i — memlekettik, 37-si — jekemenshik. Tirkelgen halyq sany 2,3 mıllıonnan asady.
№37 qalalyq emhanany ashý qańtar aıynyń ortasyna josparlanyp otyr.