Túrkıa Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Mustafa Kapýdjýdyń Almaty qalasyna alǵashqy sapary kezinde ekonomıkalyq, saýda jáne ınvestısıalyq salalardaǵy yntymaqtastyq máseleleri talqylandy, dep habarlaıdy almaty-akshamy.kz
Almaty ákimi Erbolat Dosaev atap ótkendeı, qazirgi ýaqytta qalada túrik kapıtalynyń qatysýymen birqatar jobalar tabysty jumys isteýde. TAV Airports holdıńi Almaty halyqaralyq áýejaıynyń jańa termınalyn salý boıynsha jumysty bastady, ol áýe aılaǵynyń ótkizý qabiletin jylyna 14 mln jolaýshyǵa deıin eki esege arttyrady. Iskefe Holding halyqaralyq konserni jelatın óndiretin zaýyttyń qurylysyn júrgizýde. Celkonsan Stroy JSHS metal tosqaýyl qorshaýlaryn, kópirler men jol toptaryna arnalǵan qorshaýlardy óndirý jobasyn iske asyrýda. Basqa da mańyzdy birlesken jobalardyń qataryna Nobel Pharmaceuticals farmasevtıkalyq óndirisi («Nobel AFF» AQ), panelder, tońazytqysh jáne muzdatqysh kameralar shyǵaratyn Akay Trade JSHS, Orhun Medical JSHS dıagnostıkalaý jáne emdeý úshin medısınalyq ortalyqtar jelisi, t.b. kiredi.
Qala basshysynyń aıtýynsha, túrik kásiporyndary uzaq merzimdi josparlar quryp, óz qyzmetin keńeıtý múmkindikterin izdeıdi. Túrkıadan kapıtal tartý qala ekonomıkasynyń damýyna qýatty serpin beredi.
Eń iri ınvestısıalyq jobalar Almatynyń ındýstrıalyq aımaǵynda jáne «Inovasıalyq tehnologıalar parki» arnaıy ekonomıkalyq aımaǵynda iske asyrylýda, onda kompanıalarǵa ınjenerlik ınfraqurylymǵa qoljetimdilik berildi, bıznesti júrgizý úshin jeńildikti jaǵdaılar engizilgen.
Túrkıa eń iri 10 ınvestordyń qataryna kiredi: 2005 jyldan bastap shamamen 1,2 mlrd AQSH dollary tartyldy (QR boıynsha tikeleı sheteldik ınvestısıalar kólemi 4,6 mlrd AQSH dollaryn qurady). Qazaqstanda túrik kapıtaly bar barlyq kásiporyndardyń jartysynan kóbi Almatyda ornalasqan – 2302 (Qazaqstanda – 4280). 2022 jyly Almaty qalasy men Túrkıa Respýblıkasy arasyndaǵy taýar aınalymy shamamen 1 mlrd AQSH dollaryn (977 mln AQSH dollarynan astam) qurady, bul ótken jylmen salystyrǵanda 64%-ǵa artyq (2021 jyly – 596 mln).
Taraptar Almaty men Túrkıa arasyndaǵy yntymaqtastyq bizdiń halyqtarymyzdyń tyǵyz baýyrlastyǵyna negizdelgen keńeıtilgen strategıalyq áriptestik rýhynda damyp kele jatqanyn atap ótti. Kezdesý qorytyndysy boıynsha seriktestikti odan ári nyǵaıtý týraly ýaǵdalastyqtarǵa qol jetkizildi.