Polıseılerdiń jumystaryna tabys tiledi.
Almaty ákimi Erbolat Dosaev Polısıa departamentine baryp, quqyq qorǵaý organdarynyń qyzmetkerlerimen kezdesti. Qala basshysy polısıa qyzmetkerlerine terorıstik aksıalar kezindegi qyzmetteri úshin alǵys bildirdi, dep habarlaıdy Almaty-akshamy.kz.
«Qurmetti Almaty qalasy polısıa departamentiniń qyzmetkerleri!
Eń aldymen qalany terrorısterden qorǵaý jolynda qaza tapqan polıseılerdiń jaqyndary men týǵan týysqandaryna kóńil aıtqym keledi.
Óz atymnan qańtar tragedıasy kezinde kásibı mindetti atqarǵanyńyz úshin alǵys aıtam. Ólimmen betpe-bet kelgen sátte eshqandaı qaýip-qaterge qaramastan batyrlyq tanytyp, qylmyskerlerge qarsy erlikpen kúrese bildińizder.
Osyndaı syn saǵattarda qala turǵyndarynyń qaýipsizdigine kepil bola alatyn ol – dál osy polısıa qyzmeti ekeni belgili. Sizder qoǵamda turaqtylyqty qamtamasyz etýshi qorǵaýshy sanalasyzdar. Al, biz óz tarapymyzdan qalanyń quqyq qorǵaý organyn odan ári jetildire túsýge kúsh jumsap, polısıa qyzmetin muqıat saralaı otyryp, turǵyndardyń senimin eseleı túsemiz.
Mundaı qaıǵyly jaǵdaıdy keleside boldyrmas úshin polısıa qyzmetin jandandyryp, zamanaýı tehnıkamen jabdyqtaý kerek ekenin qalaǵa jasalǵan shabýyl aıqyndap berdi.
Qaza tapqan polıseılerdiń otbasyna kómek kórsetildi, qazir búlingen ǵımarattar jóndelip, qaıta qalpyna keltirý jumystary júrip jatyr. Biz bárimiz qalanyń tynyshtyǵy úshin tik turyp, aıanbaı eńbek ete alatynymyzǵa senim bildirgim keledi. Biz sizderge qalanyń eń basty baılyǵy – Almaty turǵyndarynyń amandyǵy men densaýlyǵyn senip tapsyramyz.
Osyndaı qıyn da jaýapty qyzmette júrgen sizderge zor densaýlyq, kásibı turǵyda tabys, otbasylaryńyzǵa tynyshtyq pen bereke-birlik tileımin.
Qyzmetińiz úshin rahmet!»,-dedi Erbolat Dosaev.
Ákimge Jedel basqarý ortalyǵy, onyń ishinde búkil qala boıynsha ornatylǵan 10 myńnan astam beınekameraǵa qosylǵan beınebaqylaý júıesi kórsetildi.
Kezdesý sońynda Erbolat Dosaev polıseılerge jumystaryna tabys tiledi, olardyń qaýipsizdikti qamtamasyz etýdegi mańyzdy rólin jáne qyzmetterine halyqtyń senimin únemi arttyrý qajettigin atap ótti.