Aty ańyzǵa aınalǵan opera ánshisi Bıbigúl Tólegenova 95 jyldyǵyn atap ótýde
16 jeltoqsanda aty ańyzǵa aınalǵan opera ánshisi, aktrısa, pedagog Bıbigúl Tólegenova týǵan kúnin atap ótedi. Bıyl KSRO halyq ártisi, «Otan» ordeniniń ıegeri, Almaty qalasynyń Qurmetti azamaty jáne akademık 95 jasqa tolyp otyr.
Bıbigúl Ahmetqyzyn osyndaı aıtýly kúnmen quttyqtaýǵa Almaty ákimi Erbolat Dosaev keldi. Ol Qazaqstan Prezıdenti Qasym-Jomart Toqaevtyń atynan quttyqtaý hatty oqydy. Hatta ulttyq mádenıettiń damýyna zor úles qosqan kórnekti óner qaıratkeriniń eńbegi erekshe atalyp ótilgen.
«Uzaq jylǵy jemisti shyǵarmashylyq jolyńyz Sizdi abyroı bıigine kóterdi. Elimizdiń altyn qoryna mol mura qaldyrdyńyz. Ónegeli de ónerli shákirtter tárbıelep shyǵardyńyz. Eren eńbegińizdiń joǵary memlekettik nagradalarmen, mártebeli ataqtarmen jáne aıryqsha syılyqtarmen atalyp ótýi - zor mereı», - delingen Memleket basshysynyń quttyqtaýynda.
Óz kezeginde Bıbigúl Ahmetqyzy jyly lebizder úshin alǵysyn bildirip, barsha qazaqstandyqtardy Táýelsizdik kúnimen quttyqtady.
21 jeltoqsan kúni saǵat 15:00-de Respýblıka Saraıynda Bıbigúl Tólegenovanyń 95 jyldyǵyna arnalǵan saltanatty konsert ótedi. Baǵdarlamada Bıbigúl Ahmetqyzynyń shyǵarmashylyǵynan shabyt alǵan jáne ózderi de jetekshi juldyzǵa aınalǵan kórnekti ártisterdiń oryndaýyndaǵy klasıkalyq jáne qazaq mýzykasynyń uly týyndylary oryndalady.