Megapolıs turǵyndary dástúr boıynsha qyrkúıektiń úshinshi jeksenbisinde Qala kúnin atap ótedi. Almatynyń ár jerinde merekelik is-sharalar – konsertter, kórmeler, fleshmobtar, festıválder jáne basqa da kóptegen sharalar ótip jatyr.
Merekelik is-sharalar Abaı alańynda ótken «Almaty – bizdiń ortaq úıimiz» atty otbasylyq festıválden bastalyp, qala ákimi Erbolat Dosaev almatylyqtardy quttyqtady.
«Almaty árqashan aldyńǵy shepte bolyp, oń ózgeristerdiń jarqyn úlgisi bolýy kerek, buǵan bar kúshimizdi, bilimimizdi jáne tájirıbemizdi jumsaımyz. Almatyny árbir adam óz úıindeı sezinetin jaıly ári qaýipsiz qalaǵa aınaldyrý – bizdiń qolymyzda», – dedi megapolıs basshysy.
Qala basshysy dástúr boıynsha qalany damytýǵa úles qosqan azamattardy «Almaty qalasynyń Qurmetti azamaty» ataǵymen marapattady. Olardyń qatarynda kózi nashar kóretin sýretshi Alekseı Ýtkın, keskindemeshi Erbolat Tólepbaı, kompozıtor Erulan Qanafıanov, aqyn Ulyqbek Esdáýlet, tehnıka ǵylymdarynyń doktory Jumabaı Baınatov, Aqsaqaldar keńesiniń tóraǵasy Ahmetjan Shardınov, Perınatologıa jáne balalar kardıohırýrgıasy ortalyǵynyń dırektory Gúlnár Nurlanova, qurmetti ushqysh Dmıtrıı Dýshımov jáne kásipker, mesenat Nurlan Smaǵulov bar.
Sonymen qatar, qurmetti ataq Memlekettik qýyrshaq teatryna berildi.
Marapattan keıin qala ákimi alańdaǵy balalar belsendilik aımaqtaryn aralap, turǵyndarmen sóılesti. İs-shara «Almaty áýenderi» shyǵarmashylyq ujymdary men solıseriniń qatysýymen ótken merekelik konsertke ulasty.
Esterińizge sala keteıik, Abaı alańynda búgin kúndiz balalar úshin anımatorlardyń oıyn-saýyq shoýy jáne medıa tulǵalardyń qatysýymen otbasylyq sán kórsetilimi ótedi.
Keshki 18:00-de Respýblıka saraıynyń aldynda almatylyqtardy Memlekettik qýyrshaq teatrynyń «Qýyrshaq shoýy» qoıylymy men tıktok juldyzdary YOLO HOUSE, BIP HOUSE jáne basqa da tanymal almatylyqtardyń qatysýymen konsert ótedi.
Sonymen qatar, Tuńǵysh Prezıdent saıabaǵynda saǵat 10:00-de kópshilikke tanymal bolǵan Apple Fest festıvali bastaldy. Festıválde 21:00-ge deıin jalǵasatyn keń aýqymdy mádenı jáne konserttik baǵdarlama bar.
Tuńǵysh Prezıdent saıabaǵynda birneshe sahna qoıylǵan. Basty sahnada 14:30-da Roza Rymbaeva men Almaty qalasy ákimi estradalyq-sımfonıalyq orkestriniń óner kórsetýi josparlanǵan. Konsertti Steppe Sons etnotoby, Umberto Project, «Mýzart Life» toby jáne basqa da tanymal artıser jalǵastyrady. Keshtiń basty hedlaınerleri Hiro men Captown.
Kelýshilerge yńǵaıly bolý úshin saıabaq aýmaǵy birneshe taqyryptyq aımaqqa bólingen, árbir aımaqta alma jármeńkesi, Elshilik aleıasy, baqsha ınovasıalary alańy, gúlder ǵajaıyp býlvary, dám saıahaty kóshesi, qolóner sheberler kóshesi, uly dala mádenıeti dańǵyly, balalarǵa arnalǵan oıyn-saýyq alańdary, «Kitap oqıǵalary» kvesti jáne ashyq aspan astyndaǵy kınoteatr ornalasqan, munda qazaq kınosynyń «Altyn qoryna» engen fılmder kórsetiledi.
Aıta keteıik, festıvál tarıhynda alǵash ret 1 700 lıtr alma kompoty qaınatylyp, bul Gınnestiń rekordtar kitabyna enedi. Kompotty satýdan túsken qarajat kóshetter, qustarǵa arnalǵan qorektendirgishter jáne qalalyq saıabaqtarǵa arnalǵan uıalar satyp alýǵa jumsalady.
Sırk ónerin súıetinder úshin 12:00-den 17:00-ge deıin Shapıto sırki jumys isteıdi. Baǵdarlamada Efıopıadan kelgen Black Eagles ıkarlyq oıyndary, «Kýrez» atty kloýndyq kvartet, syryqtaǵy ekvılıbr jáne taǵy basqa ónerler bar. Sırk shoýyna kirý úshin bılet kerek, al saıabaqtaǵy basqa is-sharalar tegin. Shapıto bıletteri 3-4 myń teńge aralyǵynda satylyp jatyr. Festıválden keıin sırk saıabaq aýmaǵynda taǵy on kún jumys isteıdi.
- Arbatta 11:00-den bastap «Týǵan kúnińmen, Almatym» festıvali ótýde, onda qala turǵyndary men qonaqtary sýretshiler kórmesin, qolónershiler jármeńkesin, sheberlik dáristerin jáne t.b. is-sharalardy tamashalaı alady. Sonymen qatar, munda jyl saıynǵy «Kitap fest» festıvali ótip jatyr.
- Saǵat 17:00-de Astana alańynda Almaty Cover Show bastalady, oǵan qazaqstandyq estrada juldyzdary qatysady. Sahnada Naǵıma Esqalıeva, Meırambek Besbaev, Kalifarniya, RaiM, Nurlan men Murat, ARO, Erbolat Qudaıbergen, Qaırat Túntekov jáne basqa ánshiler óner kórsetedi. Osy kúni Ortalyq stadıonda Qala kúnine oraı eldegi eń tanymal ári jas artısiń biri Sadraddın alǵashqy jeke konsertin qoıady.
- Qala kúnin merekeleý «Kóktóbe» telemunarasynda turǵyndar men qala qonaqtaryna arnalǵan quttyqtaý jaryǵynyń qosylýymen aıaqtalady. Buǵan qosa, 21:00-de «Kóktóbe» saıabaǵynda merekelik otshashý bolady.
Aıta keteıik, merekelik is-sharalardyń tolyq tizimin www.almaty.kz saıtynan jáne qalalyq ákimdiktiń www.instagram.com/akimat_almaty jáne Mádenıet basqarmasynyń www.instagram.com/almatymadeniet ınstagram paraqshalarynan kórýge bolady.