Búginde Naýryzbaı aýdanynyń "Aqjar", "Shuǵyla", "Tastybulaq", "Taý joly", "Jaılaý", "Qarǵaly", "Quramys", "Taý samaly" shaǵynaýdandarynda 149,6 km sý qubyry jáne 74,8 km káriz jelilerin tartý boıynsha jumystar júrgizilýde. Jumystar tolyq aıaqtalǵannan keıin aýdannyń 150 myń turǵyny aýyz sýmen qamtamasyz etiletin bolady, dep habarlaıdy Almaty-akshamy.kz
Belgilengen birinshi baǵyt «Qarǵaly» súzgi stansıasy boldy, onyń qurylysyn aǵymdaǵy jyldyń shildesine deıin aıaqtaý josparlanýda. Jańa stansıa aýdannyń 40 myńnan astam turǵynyn sýmen ("Qaraǵaıly", "Qarǵaly", "Tastybulaq", "Quramys" shaǵynaýdandary) qamtamasyz etedi.
Osy shaǵynaýdanda turǵyndardyń jaılylyǵy úshin «Halyqtyń búdjetke qatysýy» baǵdarlamasy aıasynda balalar, oıyn jáne sport alańdary salyndy. E. Dosaev baǵdarlamany qarjylandyrýdy 500 mln teńgege (1,8 mlrd teńgege deıin) ulǵaıtýdy tapsyrdy.
Sapar barysynda Qaraǵaıly shaǵynaýdanyndaǵy dárigerlik ambýlatorıanyń apatty ǵımaraty boıynsha sheshim qabyldandy. Nysan seısmıkalyq qaýipti jáne 2018 jyly paıdalanýǵa jaramsyz dep tanylǵan. Almaty ákiminiń usynysy boıynsha ambýlatorıa ornyna «Áleýmettik qyzmetter úıi» jobasy úlgisinde kóp balaly analar úshin áleýmettik nysan salynatyn bolady.
Qala basshysy "Quramys" shaǵynaýdanyndaǵy memlekettik menshiktegi jerlerde (6 ga) emhana men balabaqsha salý úshin jobalyq-smetalyq qujattamany ázirleýdi aıaqtaýdy tapsyrdy.
Kóshpeli jıyn barysynda qala basshysy ınjenerlik jelilerdiń qurylysyna, jol jabynyn qalpyna keltirýge erekshe nazar aýdardy. Qalalyq mobıldilik basqarmasyna "Tastybulaq" shaǵynaýdanyndaǵy aǵymdaǵy jyly uzyndyǵy 4,5 km joldy asfálttaý tapsyryldy.
Qaladaǵy baý-baqsha qoǵamdastyqtarynyń máselesi ótkir tur. Osyǵan baılanysty aýdan ákimdikteri qalalyq josparlaý jáne ýrbanıstıka basqarmasymen birlesip, olardyń mártebesin naýryz aıynyń sońyna deıin anyqtaıdy. Sondaı-aq, qala basshysy "Tastybulaq" jáne "Aqjar" shaǵynaýdandaryndaǵy sý qubyry men káriz jelilerine qosý úshin jańa jobaǵa baý-baqsha qoǵamdastyqtarynyń eskerilmegen kóshelerin engizý qajettigin atap ótti.
Qala ákimi aǵymdaǵy jyldyń naýryz aıynda balalardy qabyldaıtyn "Aqjar" shaǵynaýdanyndaǵy 120 oryndyq jańa balabaqshany aralap kórdi. Sonymen qatar, kóshpeli keńes barysynda (aýdannyń ákimshilik ortalyǵy) mektep pen baseıni bar 15 ga dene shynyqtyrý-saýyqtyrý keshenin salý máselesin sheshýdi tapsyrdy.
Aınalma jol kezinde megapolıs basshysy Tóle bı kóshesi men Abaı dańǵylyn uzartýdyń jaı-kúıin tekserdi. E. Dosaev jer ýchaskelerin satyp alý prosesin jedeldetý jáne osy jobalardy 2022-2023 jyldary kezeń-kezeńmen iske asyrýdy bastaý qajettigin atap ótti. Sapar barysynda Naýryzbaı aýdanynyń ákimshilik ortalyǵyna deıin metropolıtendi jobalaý máselesi qaraldy.
Aralaı kele, qala ákimi aǵymdaǵy jyldyń qyrkúıek aıynda paıdalanýǵa berý josparlanǵan "Abaı" shaǵynaýdanyndaǵy («Alma Sıtı-5» TK, «Qazaq Stroy» merdigerlik uıymy) 1200 oryndyq mektep qurylysynyń barysymen tanysty. Sondaı-aq "Shuǵyla" shaǵynaýdanynda (Alataý dańǵyly jáne «Alem Sıtı» TK) qosymsha eki mektepti iske qosý josparlanýda.
Jalpy, aýdanda 2022 jyly barlyǵy 8390 oryndyq 7 mektep jáne 1320 oryndyq 5 balabaqsha salý josparlanýda.
Sapar qorytyndysy boıynsha qala basshysy Naýryzbaı aýdany ákiminiń jumysyn maquldady jáne «Shetsiz qala» baǵdarlamasy aıasynda aýdandy odan ári damytýdy jalǵastyrýdy tapsyrdy.