Áýezov aýdanyna jumys sapary aıasynda Almaty ákimi Darhan Satybaldy birqatar áleýmettik mańyzy bar nysandy aralap kórdi.
Qala ákimi Saıran shaǵynaýdanyndaǵy kóriktendirý jumystarynyń barysymen tanysty. Munda aýlalar men qoǵamdyq keńistikterdi jańǵyrtýǵa baǵyttalǵan aýqymdy joba kezeń-kezeńimen júzege asyp jatyr. Qurylys-montaj jumystary bıyl 10 mamyrda bastalǵan. Joba aıasynda 14 aýla, sondaı-aq kólge aparatyn joldar jańarady. Ári trotýarlar men sport alańdary jabdyqtalyp, kógaldandyrylyp, jaryq tartylmaq. Atalǵan aýmaqtarǵa beınebaqylaý kameralaryn ornatý da josparda bar. Aıta keteıik, Darhan Satybaldy shaǵynaýdandy aralaý barysynda turǵyndarmen kezdesip, tildesti.
Kelesi nysan – «Tıgrohaýd» bazary. Mundaǵy saýda alańy 7 myń sharshy metrge deıin keńeıtilip, aýmaq kórkeıtilip jatyr. Jobany júzege asyrý shamamen 300 jańa jumys ornyn qurýǵa múmkindik beredi. Atalǵan qurylys jumystaryn 2025 jyldyń maýsymynda aıaqtaý josparlanyp otyr.
Sondaı-aq, Darhan Satybaldy N. Sas atyndaǵy memlekettik akademıalyq balalar men jasóspirimder orys teatrynyń rekonstrýksıasymen tanysty. Munda jumys belgilengen keste boıynsha júrip jatyr. Búginde negizgi buzý jáne jer qazý jumystary aıaqtalǵan. Jobaǵa saı, teatr zamanaýı sahnamen jáne tehnıkalyq jabdyqtarmen qamtamasyz etilip, aınalasyndaǵy aýmaq tolyq kórkeıtiledi. Nysandy 2026 jyly shildede tapsyrý josparlanǵan.
Sapar sońynda Darhan Satybaldy № 16 qalalyq emhanaǵa bardy. Qazir onda kúrdeli jóndeý jumystary qolǵa alynǵan. Emhana Áýezov jáne Bostandyq aýdandarynyń 58 myńnan astam turǵynyna, sonyń ishinde balalarǵa, mektep oqýshylary men stýdentterge qyzmet kórsetedi. Atalǵan nysan jobalyq qýatynan artyq jumys istep otyr, sondyqtan ǵımaratty jańǵyrtý óte ózekti. Bul óz kezeginde medısınalyq qyzmet kórsetý sapasyn jaqsartýǵa múmkindik bermek.
Nysandardy aralaý barysynda qala ákimi jaıly, qolaıly ári kórikti qalalyq orta qalyptastyrýdyń mańyzdylyǵyn atap ótti. Bul rette sapaly kógaldandyrý men qoljetimdi ınklúzıvti ınfraqurylymǵa basa nazar aýdarylýǵa tıis ekenin jetkizdi. Ákimniń aıtýynsha, qalanyń árbir aýdanynda turǵyndar úshin tolyqqandy qoǵamdyq keńistik bolýy qajet.
Sóz sońynda Darhan Satybaldy jaýapty basshylarǵa júrgizilip jatqan jumystardyń sapasy men merzimin qatań saqtaý týraly tapsyrma berdi. Sondaı-aq, ol jobalardy júzege asyrý barysynda halyqtyń barlyq sanaty úshin nysandardyń qaýipsizdigi men qoljetimdiligin qamtamasyz etý qajettigin aıryqsha atady.