Ákim eń áýeli tozyǵy jetken turǵyn úılerdi jańartý baǵdarlamasynyń júzege asý barysyn kórdi. 2025 jyly mamyrdaǵy jaǵdaı boıynsha aýdanda 75 eski úı (821 páter, 127 páter ıesi jańa baspanaǵa kóshirilgen) bar. Bul úıler Jandosov, Túntibaev, Taldyqorǵan, Pátnıskıı, Toqtabaev, Cherepanov, Rysqulbekov jáne Súleımenov kóshelerinde ornalasqan. Jańǵyrtý jumystary segiz kezeńmen júrgizilip jatyr, onyń alǵashqysy 2023 jyly aıaqtalǵan.
Budan keıin ákim Mamyr-4 shaǵynaýdanyndaǵy káriz jáne sý qubyry jelileriniń qurylysyna at basyn burdy. Munda aýdandyq mańyzy bar bir kóshe – M.Kárim kóshesi jáne 14 ótpe jol bar. Joba aıasynda Momyshuly, Saın kósheleri men Abaı dańǵylyna ınjenerlik jeliler tartý qarastyrylǵan. Qurylysqa deıin bul aýmaqtaǵy ınjenerlik ınfraqurylymnyń tozýy 90%-ǵa jetken bolatyn.
2024 jyly tamyzda bastalǵan joba aıasynda barlyǵy 12,3 shaqyrym ınjenerlik jeli tartý kózdelgen. Qazirgi ýaqytta 3,5 shaqyrym káriz jáne 3 shaqyrym sý jelisi salyndy.
Sapar barysynda Darhan Satybaldy Aqsaı-1 shaǵynaýdanyna da bardy. Aqsaı-1, 1A, 3, 3A jáne 3B shaǵynaýdandarda shamamen 36 myń adam ómir súredi. Alaıda munda zamanaýı sporttyq nysandar, ásirese baseın tapshy. Sondaı-aq, 1–1,5 shaqyrym jerdegi saıabaq pen demalys oryndarynyń bolmaýy turǵyndardyń belsendi ómir saltyn ustanýyna yńǵaısyzdyq týdyryp otyr.
Osyǵan baılanysty, tórt jer telimin memleket muqtajyna alyp, yńǵaıly saıabaq aımaǵy bar dene shynyqtyrý-saýyqtyrý keshenin salý múmkindigi qarastyrylyp otyr. Atalǵan jer jalǵa berilgen, onyń úsheýiniń jaldaý merzimi aıaqtalǵan.
Shahar basshysy Tóle bı kóshesin qala shekarasyna deıin uzartý jobasynyń júzege asýyn da tekserdi. Joba eki ýchaskeden turady. Birinshisi Iassaýı kóshesinen Áshimov kóshesine deıingi aralyq. Munda ınjenerlik jelilerdi qaıta salý jáne jol tósemin daıyndaý jumystary júrip jatyr. Ekinshisi Áshimov kóshesinen qala shekarasyna deıingi bólik. Bul aýmaqta da jer jumystary men komýnıkasıany kóshirý qolǵa alynǵan.
Kelisimshartqa sáıkes, qos ýchaskedegi qurylysty 2025 jyldyń jeltoqsan aıyna deıin aıaqtaý josparlanǵan.
Buǵan qosa, qala ákimi Aqsaı-4 shaǵynaýdanyndaǵy jańartylyp jatqan skverdiń jaı-kúıin kórip, turǵyndarmen kezdesti. Joba aıasynda 45 jaryq baǵany, 26 beınebaqylaý kamerasy, 4,6 myń sharshy metr kespe tas, 46 oryndyq pen qoqys jáshigin ornatý, 245 aǵash pen 200-den astam buta egý, avtomattandyrylǵan sýarý júıesin qurý, zamanaýı balalar jáne sport alańdary men qurǵaq sýburqaq salý qarastyrylǵan. Sondaı-aq, múmkindigi shekteýli jandarǵa arnap kedergisiz orta jasalmaq.
Sapar sońynda Darhan Satybaldy turǵyn úı qoryn jańartý baǵdarlamasy aıasynda ınjenerlik jeliler men jolǵa túsetin júktemeni esepteýdi, Mamyr-4 shaǵynaýdanynda bastalǵan jumysty qyrkúıekke deıin bitirýdi júktedi. Sonymen qatar, DSK salýǵa nıetti jeke ınvestor tabylsa, bul múmkindikti de qarastyrýǵa daıyn ekenin jetkizdi.
Tóle bı kóshesin uzartýǵa arnalǵan jer telimderin tez arada satyp alyp, Aqsaı-4 skverin kórkeıtip, barshaǵa qoljetimdi orta qalyptastyrýdy mindettedi.