Almatyda Abaı dańǵyly men Masanshy kóshesiniń qıylysynda ornalasqan burynǵy Oqý-klınıkalyq ortalyqtyń ǵımaraty qalalyq balalar ońaltý ortalyǵy bolyp qaıta jańartylady. Almaly aýdanynyń turǵyndarymen kezdesý barysynda Almaty ákimi Erbolat Dosaev búgingi tańda jobany túzetý aıaqtalǵanyn habarlady.
«Jetisý sáýlet qurylys» JSHS ázirlegen bastapqy joba saraptamadan ótpedi, sondyqtan jumystyń bastalý merzimi ózgerdi. Búgingi tańda jańa joba ázirlendi. Joba memlekettik saraptamadan shyqqannan keıin merdigerlik uıymdy anyqtaý boıynsha konkýrs ótkizilip, sodan keıin tikeleı qurylys-montajý jumystary bastalady», - dep atap ótti megapolıs ákimi.
Bir aýysymda 250 kelýshige arnalǵan ortalyq tirek-qımyl apparaty aýrýlary, balalardyń serebraldy sal aýrýy, sóıleý patologıasy, sondaı-aq aqyl-oı damýynyń aýytqýy bar 18 jasqa deıingi balalardy keshendi ońaltýǵa arnalǵan.
Nysan sáýlet eskertkishi bolǵandyqtan, joba zamanaýı materıaldardan qasbettiń bastapqy kórinisin qalpyna keltirýdi qarastyrady.