Byltyr qyrkúıek aıynda Almaty ákimdigi tarapynan jobany túzetýge baılanysty barlyq másele sheshilip, qajetti qarajat bólindi.
Erbolat Dosaev tapsyrý merzimi merdigerlik uıymdardyń sapasyz jumysyna baılanysty birneshe ret ózgergen bilim berý men densaýlyq saqtaý salasyndaǵy qurylysy uzaqqa sozylǵan nysandardy aralady, dep habarlaıdy Almaty-akshamy.kz.
Qala basshysy №48 mektep-lıseıge qosymsha qurylys salý jumystyń barysymen tanysty, bul mekteptegi oryn sanyn 260-tan 510-ǵa deıin arttyrýǵa múmkindik beredi. Jańa asqana, sport jáne akt zaldaryn qosqanda ǵımarattyń jalpy aýdany 6,5 myń sharshy metr.
Bilim uıasy 2021 jyldyń 30 maýsymynda rekonstrýksıa úshin jabylǵan, áý basta nysan 2022 jyldyń 30 sáýirinde paıdalanýǵa berilýi kerek edi. «Rıgolıt» JSHS (Almaty qalasy) bas merdigeriniń kinásinen jumysty aıaqtaý merzimi úshinshi ret ózgerdi. Kesteden keshigýge jobalaý-smetalyq qujattamaǵa engizilgen ózgerister men smetany túzetý sebep bolǵan. «Kaspıı mańy qurylys basqarmasy-SHymkent» JSHS bas jobalaýshysy (Shymkent qalasy) jobada shatyrǵa arnalǵan materıaldardy, drenajdy, syrtqy jylý trassasyn tartýdy eskermegen jáne jylý men ystyq sýdy áleýmettik mańyzdy nysanǵa jetkizý úshin qazandyqty rekonstrýksıalamaǵan.
Byltyr qyrkúıek aıynda Almaty ákimdigi tarapynan jobany túzetýge baılanysty barlyq másele sheshilip, qajetti qarajat bólindi. Biraq «Rıgolıt» JSHS qajetti resýrstardy jumyldyra almady jáne mektep qurylysyn 2022 jyldyń sońyna deıin aıaqtaı almaı, mindettemelerin oryndamady.
Qazirgi tańda birinshi jáne ekinshi bloktaǵy jumystar 95%-ǵa aıaqtaldy, kabınetter 95%-ǵa jabdyqtaldy. Úsh blok salý, mektep aýmaǵyn abattandyrý boıynsha jumystar bitpedi, sporttyq jabyn, jas toptary boıynsha qorshaý jáne t b. ornatý qajet.
Aýa raıyn eskere otyryp, keıbir jumystar, sonyń ishinde abattandyrý kóktemge aýystyryldy. 2023 jyldyń ekinshi toqsanynda jumysty tolyq aıaqtaý josparlanǵan. Ákim qurylys basqarmasyna mejeli merzimniń taǵy da ózgermeýine jol bermeý úshin, jumysty qatań baqylaýǵa alýdy tapsyrdy.
Almaty ákimi 760 oqýshyǵa arnalǵan №145 jalpy bilim beretin mektepti seısmıkalyq kúsheıtý jáne kúrdeli jóndeý jumysymen de tanysty. Mektep 30 jyldan astam ýaqyt buryn salynǵan jáne jóndeýdi qajet etken.
Tıisti jumys 2021 jyldyń tamyzynda bastaldy, bastapqyda nysandy 2022 jyldyń naýryzynda paıdalanýǵa berý josparlanǵan. Alaıda, «Korporasıa Aq Ordasy» JSHS bas merdigeriniń sapasyz jumysyna baılanysty merzimdi úshinshi ret aýystyrdy. Kesteden kesh qalýǵa jobalaý-smetalyq qujattamanyń shıkiligi (ázirlengen jyly – 2020, avtory – «Sheber» kompanıasy» JSHS, Jezqazǵan qalasy) jáne materıaldar men qyzmetterdiń qazirgi baǵalarǵa saı kelmeýi basty sebep boldy.
Qazirgi tańda árleý, shatyrlaý, aýmaqty abattandyrý bitpegen. Nysandy jańa oqý jylyna deıin tapsyrý josparlanýda. Erbolat Dosaev kezekti merzim sozylǵan jaǵdaıda merdigerdi sotqa berýdi tapsyrdy.
«Korporasıa Aq Ordasy» JSHS taǵy bir joba – «Balalar shuǵyl medısınalyq kómek ortalyǵy» sharýashylyq júrgizý quqyǵyndaǵy memlekettik komýnaldyq kásiporny úshin operasıalyq blogy bar qabyldaý bólimi ǵımaratyn salýmen aınalysty. Bul jumys 2021 jyldyń tamyzynda bastaldy, kelisimshartqa sáıkes, byltyr jeltoqsanda aıaqtalý kerek edi. Alaıda «Korporasıa Aq Ordasy» JSHS-niń sapasyz jumysynyń saldarynan áleýmettik mańyzdy nysan ýaqytynda tapsyrylǵan joq.
Sonyń nátıjesinde qala ákimdigi jumys qarqynyn jedeldetý úshin birqatar uıymdastyrýshylyq sharalardy qabyldady, qosymsha jumys kúshi men tehnıka jumyldyryldy. Qurylys-montaj jumystaryn jalǵastyrý úshin «Atrıks Stroı» JSHS qosalqy merdigerlik uıymy tartyldy. Erbolat Dosaev qurylys basqarmasyna mejeli merzimde oryndaýdy jiti baqylaýda ustaýdy jáne «Korporasıa Aq Ordasy» JSHS kompanıasynyń jergilikti búdjetten bólingen qarajattyń maqsatty paıdalanylýyn tekserýdi tapsyrdy.
Qala ákimi №2 Almaty memlekettik gýmanıtarlyq-pedagogıkalyq kolejiniń ǵımaratyndaǵy qosymsha qurylys jobasymen de tanysty. Salynyp jatqan ǵımaratta 300 oryndyq oqý ǵımaraty, 129 oryndyq akt zaly jáne 84 oryndyq asqana bolady. Qazirgi ǵımarat 60 jyl buryn salynǵan. Búginde 410 oryndyq kolejde 1042 stýdent oqıdy.
Bastapqy joba boıynsha irgeles stadıon aýmaǵynda jeke ǵımarat salý kózdelgen. Jobany talqylaý barysynda ákimdik jergilikti turǵyndardyń talabyn eskerip, jasyl aımaq pen sport nysanyn saqtaý maqsatynda qoldanystaǵy kolej ǵımaratyna qosymsha qurylys salý máselesi qaraldy. Qurylys basqarmasy jobalaý-smetalyq qujattamany ázirleýge kiristi. Joba fýtbol, basketbol, voleıbol alańy, vorkaýt-aımaqtar men balalar alańdary ornalasatyn stadıondy jańǵyrtýdy kózdeıdi. Bas jobalaýshy - «DIAS Proekt» JSHS, qurylys 2023 jylǵy shildede bastalady.
Erbolat Dosaev qurylys basqarmasyna qańtar aıynyń sońyna deıin turǵyndardyń pikiri men usynysyn eskere otyryp, eskızdik jobany qala qurylysy jáne ýrbanıstıka basqarmasymen kelisýdi, sonymen qatar barlyq jasyl jelekti kolej aýmaǵynan kóshirýdi jáne saqtaýdy tapsyrdy.
Nysandardy aralaý barysynda qala basshysyna № 9 mektep-ınternatqa qosymsha qurylys jumystary kórsetildi. Jobalyq qýaty 220 oryndyq oqý ordasynda 328 bala oqıdy. Salynyp jatqan ǵımaratta oqý ǵımaraty men asqana oryn tebedi.
Bas merdiger – «Barat & Co» JSHS (Shymkent qalasy). Kompanıa qurylys-montaj jumystaryn 2021 jylǵy 20 shildede bastady, alǵashynda nysan ótken jyldyń qańtarynda paıdalanýǵa berilýi tıis bolatyn. Sol kezden bastap bul merzim eki ret ózgerdi.
2020 jylǵy joba qurylys materıalynyń qymbattaýyna baılanysty qazirgi baǵalarǵa sáıkestendirip, túzetýge baǵyttalǵan. Muny eskere otyryp, «BARAT & CO» JSHS qurylysty byltyr jyl sońyna deıin aıaqtaýy tıis edi, sebebi qurylys basqarmasyna tapsyrys berýshi qurylysqa arnalǵan barlyq rásimdi oryndady, qajetti qarajat bólindi. Jeltoqsan aıynda «Barat & Co» JSHS merdigerlik uıymyna qatysty uzartylǵan merzimdi buzǵany úshin sotqa talap aryz berildi. Kompanıanyń kinásinen mektep-ınternat tórtinshi jyl jumys istemeı tur, oqýshylar basqa oqý oryndarynda ýaqytsha oqýǵa májbúr.
Nysandy aralaý barysynda Erbolat Dosaev qurylys-montaj jumystaryna, onyń ishinde ishki esiktiń jáne t.b. materıaldyń sapasyzdyǵy týraly eskertý jasady. Abattandyrý jumystaryn eskere otyryp, nysandy bıylǵy jyldyń mamyr aıynda tapsyrý josparlanyp otyr, oqýshylar oqý jylynyń basynan qaıta qabyldanady.
Jumys saparynyń qorytyndysy boıynsha qala ákimi tıisti basqarmaǵa qurylys qarqynyn jedeldetýdi, qurylys jumystary men qoldanylatyn materıaldardyń sapasyna, sonymen birge, áleýmettik nysandardy zamanaýı jabdyqtarmen qamtamasyz etýge basa nazar aýdarýdy tapsyrdy.