Almaty ákimi Erbolat Dosaevtyń halyqpen kezekti kezdesýi Áýezov aýdanynda ótti. Qala basshysy aýdannyń damýy jáne turǵyndardan kelip túsken usynystar boıynsha atqarylǵan jumystar týraly aıtty. Kezdesýge 250-den astam adam keldi, dep habarlaıdy Almaty-akshamy.kz.
Qala ákimi Erbolat Dosaev atap ótkendeı, aýdannyń negizgi ózekti máselesi áleýmettik ınfraqurylymmen qamtamasyz etý bolyp tabylady.
2022 jylǵa 1 mektep ashý, 3 mektepti keńeıtý jáne 2 jańa mektepti jobalaý josparlanǵan.
Mektepke deıingi mekemelerde oryn tapshylyǵyn azaıtý úshin aýdanda 280 oryndyq 2 memlekettik balabaqsha salý josparlanýda. "Altyn besik" shaǵynaýdanyndaǵy 120 oryndyq birinshi balabaqshanyń qurylys-montaj jumystary 2023 jyldyń birinshi toqsanyna josparlanǵan. Ekinshi balabaqsha boıynsha 10-shy shaǵynaýdandaǵy 160 oryndyq balabaqsha úshin aǵymdaǵy jyldyń 10 mamyrynda qaraýsyz qalǵan balabaqsha ǵımaraty satyp alyndy. Qurylysty memlekettik saraptamadan jáne qoldanystaǵy ǵımaratty buzǵannan keıin kelesi jyly bastaý josparlanýda.
Erbolat Dosaevtyń aıtýynsha, densaýlyq saqtaý salasynda emhanalardyń shamadan tys júktelýi ózekti másele bolyp qalýda. Aýdandaǵy jaǵdaıdy sheshý úshin, 2023 jyldyń birinshi toqsanyna aýysymyna 200 kelýshige arnalǵan otbasylyq-dárigerlik ambýlatorıanyń qurylysyn aıaqtaý josparlanýda. Sondaı-aq, kelesi jyly aýysymyna 300 kelýshige arnalǵan №18 emhananyń jańa negizgi ǵımaratynyń qurylysyn bastaý josparlanýda.
Aýdannyń jol ınfraqurylymynyń sapasyn arttyrý maqsatynda 50 kóshege aǵymdaǵy jóndeý júrgizildi. Jyl sońyna deıin uzyndyǵy 32,4 km 23 kóshe men ótpe joldardy jóndeý jumystary josparlanǵan.
Kólik aǵynynyń shamadan tys júktelý problemasyn sheshý úshin aǵymdaǵy jyldyń mamyr aıynda metropolıtenniń «Sary-Arqa» jáne «Baýyrjan Momyshuly» eki jańa stansıasy iske qosyldy. Bul metrodaǵy kúndelikti jolaýshylar aǵynyn 50-den 70 myń adamǵa deıin arttyrýǵa múmkindik berdi.
Jaýyn-shashyn jaýǵan kezde sý basý máselesi aýdanda óte ózekti másele bolyp qalýda. Aýdan boıynsha turaqty sý basýdyń 5 ýchaskesi anyqtaldy, TJ jelisi boıynsha eki ýchaske joıyldy, 2022 jyldyń sońyna deıin qalǵan úsh ýchaske boıynsha jumystar aıaqtalady. Ol úshin Momyshuly kóshesinde dıametri 1 metr jáne uzyndyǵy 2,1 km jańa sý burý kanaly salynady, sondaı-aq Jubanov, Qabdolov, Ótegen batyr kóshelerindegi uzyndyǵy 3,5 km kolektor qalpyna keltiriledi. Budan basqa, 2023 jyldyń sońyna deıin uzyndyǵy 44 km 67 kóshede aryq jelileri salynyp, qaıta jańǵyrtylatyn bolady.
Aýdanda ınjenerlik ınfraqurylymdy damytý bóliginde kelesi jyldan bastap uzyndyǵy 61,8 km sýmen jabdyqtaý jáne sý burý jelileriniń qurylysy men modernızasıalaý bastalady.
«Nurly jer» turǵyn úı-kommýnaldyq sharýashylyǵyn damytý baǵdarlamasy aıasynda jyl basynan beri 8 úıdiń jalpy paıdalaný oryndary jóndeldi jáne 97 úıde 190 lıft aýystyryldy. Jyl sońyna deıin 8 úıdegi 12 lıftti qosymsha aýystyrý jáne 32 úıdegi jalpy paıdalaný oryndaryn jóndeý josparlanýda.
«Halyqtyń búdjetke qatysýy» jobasy aıasynda aǵymdaǵy jyly barlyq iriktelgen 23 joba boıynsha quny 800 mln.teńge bolatyn qurylys-montaj jumystary júrgizilýde. Jobalardy júzege asyrý tamyz aıynyń sońyna deıin aıaqtalady.
Sondaı-aq, ákim 2022 jyldyń sońyna deıin Saıran sý qoımasynyń túbin mehanıkalyq tazartý jumystary bastalatynyn atap ótti. İrgeles aýmaqty qatar abattandyra otyryp, sý qoımasyn qaıta qurýǵa JSQ ázirlenýde. Ázirleý aıaqtalǵannan keıin, jóndeý jumystaryna 2023 jyldyń 2 toqsanynda kirisý josparlanýda.
Almaty ákimimen kezdesý barysynda turǵyndar joldardy, káriz jáne elektr jelilerin jóndeý, abattandyrý jáne t. b. máselelerdi kóterdi.
Memleket basshysy Qasym-Jomart Toqaevtyń Jarlyǵymen bekitilgen halyqpen kezdesýlerdiń jańa formatyna sáıkes, jyl sońyna deıin Erbolat Dosaev toqsanyna 8 aýdannyń turǵyndarymen bir-bir kezdesýden - barlyǵy 24 kezdesý ótkizedi.