Qala basshysy Erbolat Dosaev «Almaty halyqaralyq áýejaıy» AQ prezıdenti Alp Er Týnga Ersoımen kezdesip, áýejaı men irgeles aýmaqtyń kólik ınfraqurylymyn damytý boıynsha birlesken is-sharalardy talqylady, dep habarlaıdy Almaty-akshamy.kz
Almaty ákimine Almaty halyqaralyq áýejaıy men irgeles aýmaqtyń kólik ınfraqurylymyn damytýdyń 2050 jylǵa deıingi perspektıvasy jaıly sheber jospar tanystyryldy. Bul qujat qala basshysynyń tapsyrmasymen Almatynyń Bas josparymen úılestirildi.
Sheber jospardyń birinshi kezeńi jańa jolaýshylar termınalyn salýdy jáne qoldanystaǵy termınaldy jańǵyrtýdy kózdeıdi. Búgingi tańda ushaqqa shyǵatyn joldar keńeıtildi, qosymsha aýa baptaý júıesi engizildi, jańa jaıly avtobýstar satyp alyndy. Basqa kezeńder aıasynda qujatqa sáıkes, halyqaralyq baǵyttardyń sanyn kóbeıtý, jańa ǵımarattar salý, avtoturaq aımaǵyn keńeıtý jáne t.b. josparlanyp otyr.
Barlyq baǵyt boıynsha qurylys jumystary qarqyn alaǵan. Osylaısha, jańa jolaýshylar termınaly 80% daıyn, jalpy maqsattaǵy avıasıa ǵımaratynyń qurylysy aıaqtaldy, estakadany, ushý-qoný jolaǵyn jáne vokzal mańy aýmaǵyn qaıta jańartý jalǵasyp jatyr. Áýe aılaǵynyń qazirgi kórsetkishteri týraly aıta kele Alp Er Týnga Ersoı júk tasymalynyń ósip otyrǵanyn habarlady jáne bıyl jyl sońyna deıin 9-mıllıon jolaýshy tirkeledi dep boljam jasady.
Óz kezeginde Erbolat Dosaev jolaýshylar sanynyń edáýir artýyna baılanysty qurylys jumystaryn jedeldetýdiń mańyzyna nazar aýdardy. «Almaty halyqaralyq áýejaıy» AQ prezıdenti qala basshysyna jumystyń joǵary qarqynyn eskerip, jańa termınaldy iske qosý jazǵy maýsymnyń basynda, demalys kezeńine deıin júzege asyrylatynyn baıandady.
Esterińizge sala keteıik, jańa halyqaralyq jolaýshylar termınalynyń aýdany 53,500 m2. Bul termınaldy iske qosý áýejaıdyń ótkizý qabiletin jylyna 7 mln-nan 14 mln adamǵa deıin arttyrýǵa, qala turǵyndary men qonaqtary úshin meılinshe qolaıly jaǵdaı jasaýǵa, sonymen birge Almatynyń búkil Ortalyq Azıadaǵy kólik-logıstıkalyq hab retindegi pozısıasyn nyǵaıtýǵa múmkindik beredi.