Almaty ákimi Erbolat Dosaev Bostandyq aýdany turǵyndarymen kezdesý barysynda apatty jaǵdaıdaǵy aǵashtardy kesý erejesin túsindirdi, dep habarlaıdy aqshamnews.kz
«Qala turǵyndaryna aǵashtardy kesý men alyp tastaý máselesi árdaıym kóp suraq týǵyzatynyn túsindirgim keledi. Bireýler qoldaıdy, bireýler qarsy. Sondyqtan biz osyndaı sharalardyń ne úshin qabyldanǵanyn barlyǵy túsinýi úshin egjeı-tegjeıli zertteý júrgizemiz. Ákimdik saý aǵashtardy kesip jatyr degen teris pikirler de boldy. Munyń barlyǵy jańa Erejede eskerildi. Men ótken jyldan beri túsken ótinishterdi birinshi kezekte qarastyrýdy suradym. Jer kepken boıda jumystar bastalady», – dedi Erbolat Dosaev.
Qala basshysynyń tapsyrmasymen kezdesýde turǵynnyń apatty jaǵdaıdaǵy aǵashtardy kesý máselesine qatysty ótinishi naýryz aıynyń sońyna deıin oryndalady. Jalpy, bıyl aýdan boıynsha 2 myń apatty jaǵdaıdaǵy aǵashty kesý josparlanǵan.
«Taza Qazaqstan» respýblıkalyq baǵdarlamasy jáne «Almaty – bizdiń ortaq úıimiz» qalalyq naýqany aıasynda qaladaǵy qoǵamdyq keńistikterdi kógaldandyrý qarqyndy jalǵasýda. 2030 jylǵa deıin 2,5 mıllıon jasyl jelek otyrǵyzý boıynsha Jol kartasy bekitilgen.
Bıyldan bastap Almaty ákimdigi aǵash otyrǵyzýda iri kólemdi kóshetterdi jappaı qoldanatyn bolady. Osylaısha, 4 metrden 6 metrden joǵary 27 myń kóshet otyrǵyzý josparlanǵan.
Kóriktendirý sharasynyń mańyzdy kezeńiniń biri – Qarasý shaǵyn aýdanyndaǵy skverge iri kólemdi aǵashtar otyrǵyzý boldy. Munda bıiktigi 6 metrlik qaraǵaılar paıda boldy.