Almaty ákimi Darhan Satybaldy sý tazartý salasynda ınovasıalyq sheshimderimen tanymal bolǵan amerıkalyq World Water Works kompanıasynyń basshylarymen júzdesti.
Kezdesýge QR SİM Investısıalar komıteti tóraǵasynyń orynbasary Sultanǵalı Kınjaqulov, «KAZAKH INVEST» UK» AQ basqarma tóraǵasynyń mindetin atqarýshy Aıbol Arǵynǵazınov jáne World Water Works kompanıasynyń prezıdenti Amaresh Konamanenı qatysty.
Taraptar Almatyda káriz-tazartý nysanyn jańǵyrtý boıynsha birlesken jobany talqylady. Qazaqstan tarapynan megapolıstiń sý burý júıesin jetildirýge baǵyttalǵan josparyn bólisti. Al World Water Works ókilderi AQSH, Eýropa jáne Azıadaǵy aǵyn sýlardy tazartýdyń ozyq tehnologıasyn tanystyrdy.
«Almaty úshin tazartý qurylystaryn jańǵyrtý jáne sý burý júıesiniń tıimdiligin arttyrý – basty basymdyqtardyń biri. Bul jobalar ekologıaǵa, almatylyqtardyń ómir súrý sapasyna jáne qalanyń damýyna tikeleı qatysty. Biz World Water Works kompanıasymen seriktes bola otyryp, úlken múmkindikke qol jetkizemiz. Zamanaýı tehnologıa engizý arqyly aǵyn sýlardy tazartý deńgeıin edáýir arttyra alamyz», – dedi Darhan Satybaldy.
Sultanǵalı Kınjaqulov memleket jobany júzege asyrýǵa jan-jaqty qoldaý kórsetetinin atap ótti. Onyń aıtýynsha, ekologıa, ınfraqurylym jáne sýmen qamtý salasyna sheteldik ınvestorlardy tartý – el úshin basty mindettiń biri. Qazaqstan bıznestiń uzaq merzimdi jumys isteýi úshin jaǵdaı jasap, barlyq kezeńde qoldaý kórsetip keledi.
Óz kezeginde World Water Works kompanıasynyń prezıdenti Amaresh Konamanenı uıymnyń AQSH, Kanada, Meksıka, Ońtústik-SHyǵys Azıa men Taıaý Shyǵysta jobalardy sátti júrgizip jatqanyn aıtty. Endi olar Ortalyq Azıa naryǵyna qadam baspaq. Sondaı-aq, ol World Water Works Astanada jumys bastap ketkenin jáne Almatyny jańa jobalarǵa serpindi baǵyt retinde qarastyryp otyrǵanyn jetkizdi.
Kezdesý sońynda taraptar birlesken jobany egjeı-tegjeıin talqylaýdy jalǵastyryp, memlekettik-jekemenshik áriptestik aıasynda seriktestikti tereńdetýge nıet bildirdi.