Almaty qalasynyń ákimi Darhan Satybaldy Turǵut Ozal kóshesinde ornalasqan «№58 jalpy bilim beretin mektep» KMM ǵımaratyna japsarlas salynǵan qosalqy nysandy qaıta qurý alańyna bardy.
Joba boıynsha munda mektep janynan zamanaýı oqý jáne sport úı-jaıy bar 576 oryndyq qosymsha nysan salynýǵa tıis. Jumys 2024 jyldyń shildesinde bastaldy, al kelisimshart boıynsha 2025 jyldyń jeltoqsanynda aıaqtalýy kerek edi. Alaıda, qurylys bekitilgen kesteden edáýir artta qalyp otyr.
Ákim balalardyń oqýǵa orny joq ekenin, sondyqtan jaǵdaı shuǵyl sheshýdi talap etetinin atap ótti. Merdigerge kemshilikti joıý úshin eki apta merzim berildi. Qala basshysy jumys barysyn kúndelikti baqylaý jáne qarajatty ashyq paıdalaný qajettigin atap ótti.
«Merzimi eki apta. Biz jumystyń qarqynyn qadaǵalaımyz, kún saıyn maǵan jaǵdaı týraly baıandaısyzdar. Nysan meniń jiti baqylaýymda. Eger eshqandaı ózgeris bolmasa, biz shartty buzamyz. Merdigerler jumysty qosalqy merdigerlerge aýystyrýdyń ornyna óz kúshterine senýi kerek», - dedi Darhan Satybaldy.
Bilim basqarmasyna, Qurylys basqarmasyna jáne jaýapty qyzmetterge nysandy erekshe baqylaýǵa alý jáne jumys barysy týraly apta saıyn baıandaý tapsyryldy.
Qaıta qurý aıasynda jertólesi men sport zaly bar jańa úsh qabatty korpýs salý, asqana men akt zaly bar blok turǵyzý, zamanaýı standarttarǵa sáıkes jumys istep turǵan mektep úı-jaılaryn qaıta josparlaý jáne jańartý, sondaı-aq ınjenerlik jelilerdi, shatyrdy jáne órt qaýipsizdigi júıelerin aýystyrý kózdelgen.