Almaty qalasynyń ákimi Erbolat Dosaevtyń tóraǵalyǵymen jáne QR Sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń basshysy Arman Rahımovtyń qatysýymen Almaty qalalyq sybaılas jemqorlyqqa qarsy is-qımyl jónindegi komısıasynyń keńeıtilgen otyrysy ótti, dep habarlaıdy aqshamnews.kz
Jıynda avtojol salasyndaǵy sybaılas jemqorlyq táýekelderine syrtqy taldaý nátıjeleri boıynsha engizilgen usynymdardyń oryndalýy, sondaı-aq kvazımemlekettik sektor uıymdaryndaǵy sybaılas jemqorlyqqa qarsy komplaens-qyzmetterdiń jumysy qaraldy. Sonymen qatar, Almaty qalasynyń Ádep keńesiniń qyzmeti týraly esep tyńdaldy.
Kóterilgen máseleler boıynsha sybaılas jemqorlyqqa qarsy is-qımyldy kúsheıtýge baǵyttalǵan naqty usynystar berildi.
Qurylys jáne jol jóndeý salasynda Almaty ákimi E.Dosaevtyń tapsyrmasymen QR Indýstrıa jáne qurylys mınıstrligine avtorlyq jáne tehnıkalyq qadaǵalaý jumystaryn oryndaýshylardyń jaýapkershiligin arttyrý maqsatynda zańnamaǵa ózgerister engizý jóninde usynystar joldandy.
Sonymen qatar, ákimniń tapsyrmasyna sáıkes, kvazımemlekettik uıymdardaǵy komplaens-qyzmetter úshin maman daıarlaý máselesi qarastyrylatyn bolady. Osyǵan baılanysty bıylǵy jylǵa arnalǵan tıisti jumys jospary ázirlenedi.
Memlekettik qyzmetterdiń sapasyn arttyrý jáne memlekettik qyzmetshilerdi sybaılas jemqorlyqqa qarsy oqytý jumystary da jalǵasady.
A. Rahımov sybaılas jemqorlyqqa qarsy tıimdi is-qımyl keshendi tásildi talap etetinin atap ótti. Ol tek quqyqbuzýshylyqtardy anyqtaýmen jáne jolyn kesýmen ǵana shektelmeı, aldyn alý sharalaryn da qamtýy qajet. Negizgi mindetter – kvazımemlekettik sektorda komplaens-júıeni damytý, sybaılas jemqorlyqqa qarsy usynystardy oryndaý jáne ashyqtyqty arttyrý.
Jalpy, Almaty qalasynyń sybaılas jemqorlyqqa qarsy is-qımyl departamentimen birlesken jumystyń nátıjesinde quqyqbuzýshylyqtardyń aldyn alý jáne olardy boldyrmaý baǵytynda oń dınamıka baıqalyp otyr.
Otyrys qorytyndysy boıynsha qala ákimi E. Dosaev jergilikti atqarýshy organdaǵy sybaılas jemqorlyqtyń aldyn alý jáne oǵan qarsy is-qımyl jónindegi jumystar qala basshylyǵynyń erekshe baqylaýynda ekenin jáne bul baǵyttaǵy sharalar bıyl da jalǵasatynyn atap ótti.
Aýdan ákimderi men qalalyq basqarma basshylaryna jumysty jandandyryp, qoıylǵan mindetterdi júıeli túrde sheshý tapsyryldy.