Memleket basshysy Qasym-Jomart Toqaevtyń tapsyrmasy boıynsha shaǵyn jáne orta bızneske keltirilgen shyǵyndy ǵana emes, qańtar aıyndaǵy oqıǵalar kezinde avtomobılderi búlingen nemese joıylǵan Almaty qalasynyń turǵyndaryna da qatysty jumystar júrgizilýde, dep habarlaıdy Almaty-akshamy.kz.
Qazirgi ýaqytta Almaty qalasy aýdandarynyń ákimdikterine avtokólik ıelerinen keltirilgen zalaldy óteý týraly 99 ótinish kelip tústi. Jeke tulǵalarǵa keltirilgen shyǵyndy óteý tetigine sáıkes (Úkimettiń 2013 jylǵy 28 tamyzdaǵy №877 qaýlysymen bekitilgen Terorızm aktisi saldarynan jeke jáne zańdy tulǵalarǵa keltirilgen múliktik zıandy óteý qaǵıdalary boıynsha), jalpy somasy 258 mln teńgege 54 ótinim qanaǵattandyryldy (Almaly aýdany – 33, Áýezov aýdany – 9, Túrksib aýdany – 12).
Aýdan ákimdikteriniń qaraýynda búlingen jáne janyp ketken avtokólikter jóninde taǵy 45 ótinim bar (Bostandyq aýdany – 40, Medeý aýdany – 5). Olar boıynsha tólemderdi aǵymdaǵy jyldyń 15 mamyryna deıingi merzimde júrgizý josparlanýda. Qosymsha ótinimderdiń túsýine qaraı Almatynyń aýdandyq ákimdikteri osy baǵyttaǵy jumysty jalǵastyratyn bolady.
Ótinishterdi aýdandyq ákimdikter túsken kúnnen bastap 1 aı ishinde qaraıdy. Múlikke keltirilgen zalaldy baǵalaý ótinish tirkelgen kúnnen bastap 7 kún merzim belgilenedi jáne zardap shegýshiniń ózi tańdaǵan táýelsiz sarapshylar júrgizedi. Baǵalaý boıynsha shyǵystardy júrgizý memlekettik organdarǵa, ıaǵnı aýdandyq ákimdikterge júktelgen.